Elektr stansalaryndaǵy aqaýlar sany 11 paıyzǵa artty – Nurlan Noǵaev

NUR-SULTAN. QazAqparat – Energetıka mınıstri Nurlan Noǵaev Úkimet otyrysynda jylytý maýsymy kezindegi aqaýlardyń sebebine toqtaldy, dep habarlaıdy QazAqparat tilshisi.

Mınıstrdiń aıtýynsha, ótken jylytý maýsymy boıynsha qysqy eń joǵarǵy elektr energııasyn óndirý júktemesi 28 jeltoqsanda tirkelip, 15 822 MVt quraǵan. Bul bir jyl burynǵy kórsetkishten 4%-ǵa artyq.

«2020 jyly Qazaqstannyń birtutas elektr energetıkalyq júıesinde 4458 tehnologııalyq buzýshylyq boldy. Ótken jyldyń sáıkes kezeńimen salystyrǵanda tehnologııalyq buzýshylyqtar sany 11% -ǵa artty.

Ótken jylytý maýsymynda elektr stantsııalarynda elektr energııasyn óndirýdi nól MVt-qa deıin tómendetken 36 toqtatý boldy, bul ótken jylǵy jylytý maýsymymen salystyrǵanda 14%-ǵa az», - dedi Nurlan Noǵaev.

Vedomstvo basshysy elektr jelilerinde tirkelgen iri tehnologııalyq aqaýlardyń sebebin de atap ótti.

«2020 jylǵy 20 jáne 21 qarashada jáne bıylǵy 5 qańtarda Ózbekstannyń energııa júıesi tarapynan energııany artyq alý jáne apattyq teńgerimsizdik saldarynan Qazaqstannyń birtutas elektr energetıkalyq júıesi Soltústik-Ońtústik tranzıti boıynsha bólinip, asınhrondyq rejımdi joıýdyń avarııaǵa qarsy avtomatıkasynyń áreketimen Soltústik jáne Ońtústik aımaqty jalǵaıtyn 500 kV úsh áýe elektr berý jelisi ajyratyldy. Sonyń saldarynan Almaty, Shymkent qalalaryna jáne Almaty, Qyzylorda, Jambyl, Túrkistan oblystaryna elektr energııasyn berýge shekteýler engizildi», - dedi Energetıka mınıstri.

Mınıstr 10-18 qańtar aralyǵynda Atyraý jáne Mańǵystaý oblystarynyń tutynýshylary elektr energııasynan ajyratylǵanyn da eske saldy.

«Atom jáne energetıkalyq qadaǵalaý men baqylaý komıtetiniń tehnologııalyq buzýshylyqty tergep-tekserý nátıjeleri boıynsha apattyń sebebi birqatar faktorlarǵa baılanysty ekeni, atap aıtqanda: qolaısyz aýa raıy jaǵdaılary jáne júıelik operator tarapynan tıisinshe paıdalanbaý jáne ýaqtyly sharalar qabyldamaý nátıjesinde bolǵany anyqtaldy.

Komıssııa jumysynyń nátıjeleri boıynsha osyndaı tehnologııalyq buzýshylyqtarǵa jol bermeý jónindegi negizgi uıymdastyrýshylyq jáne tehnıkalyq is-sharalar, sondaı-aq Atyraý jáne Mańǵystaý energııa toraptarynyń elektrmen jabdyqtaý senimdiligin kúsheıtý boıynsha Usynymdar ázirlenip naqty tapsyrmalar berildi», - dedi Nurlan Noǵaev.