Elektr stansalarynda kómirmen problema joq - Energetıka mınıstrligi

ASTANA. QazAqparat - Jylý berý maýsymy kestege sáıkes, shtattyq tártipte júrip jatyr. Bul týraly Ortalyq kommýnıkatsııalar qyzmetinde QR EM Atomdyq jáne energetıkalyq qadaǵalaý men baqylaý komıtetiniń tóraǵasy Suńǵat Esimhanov málim etti, dep habarlaıdy QazAqparat.

«Búginde barlyq iri elektr stansalary men qazandyqtarda 3,5 mıllıon tonnadan astam kómir jınaldy. Bul nysandardyń jartysy kómirmen jáne qalǵany gazben jumys isteıdi. Sondyqtan kómir jaǵynan eshqandaı problema joq. Barlyǵy tolyq kólemde qamtamasyz etilgen. Atap aıtqanda, 10 táýliktik jáne 20 táýliktik eki normatıv bar, osy oraıda elektr stansalary osy deńgeıde jumystaryn atqarýda», -dep túsindirdi komıtet basshysy.

Sonymen qatar S. Esimhanov gazben qamtamasyz etýde de tıisti sharalar laıyqty dárejede júrip jatqanyn tilge tıek etti.

Óz kezeginde QR Energetıka vıtse-mınıstri Baqytjan Jaqsalıev 2017 jyly kompanııalar 106,7 mln tonna kómir (kómir kontsentratyn eseptemegende) óndirgenin atap ótti. Bul kórsetkish 2016 jylǵa qaraǵanda 8,3 paıyzǵa ósti. Sonymen qatar Qazaqstannyń energııa óndiretin kompanııalaryna arnap 56,3 mln tonna kómir tıelip, onyń deńgeıi 2016 jylmen salystyrǵanda 7,1 mln tonnaǵa artyq boldy.

Munymen qosa, ótken jyly kommýnaldyq-turmystyq qajettilikter men halyqtyń suranasyn qamtamasyz etýge 12,5 mln tonna kómir baǵyttaldy. Bul óz kezeginde 2016 jylǵy kórsetkishten 18 paıyzǵa kóbirek.

«Byltyr eksportqa 29,3 tonna kómir shyǵarylyp, onyń deńgeıi 2016 jylǵa qaraǵanda 3,1 mln tonnaǵa artyq bolyp otyr», - dep naqtylady vıtse-mınıstr.

QR Energetıka mınıstrliginiń málimetine qaraǵanda, 2018 jylǵy jospar boıynsha kómir óndirý kólemi 107 mln tonnaǵa jetkizilmek.