Elektr samokattaryna qatysty jol-kólik oqıǵalary artyp keledi

NUR-SULTAN. QazAqparat – Jyl saıyn elektr samokattaryna qatysty jol-kólik oqıǵalarynyń sany artyp keledi. Bul týraly ІІM Ákimshilik polıtsııa komıteti tóraǵasynyń orynbasary Jandos Muratálıev málim etti, dep habarlaıdy QazAqparat tilshisi.

«2021 jyly samokattarǵa qatysty 68 jol-kólik oqıǵasy tirkeldi. Eger elektr samokattaryn kólik quraly retinde engizsek, onda joldaǵy qozǵalys týraly zańnamaǵa, jol erejesine ózgerister engize alamyz. Sonymen qatar kodekste tıisti jaýapkershilikti qarastyramyz. Ázirge, adamdar samokattarmen jalpy talaptar boıynsha qozǵalyp júr», - dedi J.Muratálıev elordada ótken baspasóz máslıhatynda.

Onyń aıtýynsha, bıyl elektr samokattaryna qatysty jol-kólik oqıǵalarynyń sany artqan.

«2022 jyly 41 jol-kólik oqıǵasy tirkeldi. Sebebi mundaı samokattar sany kúrt artyp otyr. Sondyqtan olarǵa qatysty jol-kólik oqıǵalarynyń da artýy túsinikti. Qazirgi kezde Almatyda elektr samokattary jıi paıdalanylady», - dedi komıtet tóraǵasynyń orynbasary.

Budan buryn habarlanǵandaı, Qazaqstanda elektr samokattardy paıdalanýdyń ulttyq standartynyń jobasy ázirlendi.

Atalǵan standart samokattardyń jyldamdyǵy men basqa da qaýipsizdik talaptaryna sáıkestigin retteıdi. Osy oraıda bul qurylǵylarda mindetti túrde jaryq shamdarynyń bolýy sııaqty talaptar eskeriledi.

Osy standarttyń aıasyna jyldamdyǵy saǵatyna 25 shaqyrymnan aspaıtyn elektr samokattary qamtylady.