Elektr samokat júrgizýshisi ereje buzǵan jaǵdaıda qandaı jazaǵa tartylady

ASTANA. QazAqparat – Іshki ister mınıstrligi Ákimshilik polıtsııa komıtetiniń tóraǵasy Qaısar Sultanbaev elektr samokatty paıdalaný kezinde ereje talaptary saqtalmasa qandaı jaza qarastyrylǵanyn túsindirdi, dep habarlaıdy QazAqparat tilshisi.

«Qazir elektr samokat júrgizýshileri jolaýshylardy jáne júkterdi tasymaldaý erejesin oryndamasa, Ákimshilik quqyq buzýshylyq týraly kodekstiń 593-baby boıynsha jaýapqa tartylady. Bul turǵyda bes aılyq eseptik kórsetkish (17 250 teńge) mólsherinde aıyppul salynady. Joldaǵy qozǵalys kezinde ózge de talaptardy buzýǵa qatysty jaýapkershilik 620-bapta eskerilgen. Osy bap aıasynda samokat júrgizýshilerin jazalaýdyń tártibi qarastyrylǵan», - dedi Q. Sultanbaev Senatta tilshiler suraǵyna jaýap bere otyryp.

Onyń aıtýynsha, samokat júrgizýshisi jolda adam qaǵyp ketip, densaýlyǵyna zaqym keltirse, onda jol-kólik oqıǵasy boıynsha jaza qoldanylady.

«Bul máselede jaýapkershilik qatań bolady. Osy turǵyda samokat júrgizýshisin qamaýǵa alý, júrgizýshi kýáliginen aıyrý sııaqty jaza eskerilgen», - dedi komıtet basshysy.

Qaısar Sultanbaev jeke adamdardyń menshigindegi samokattardyń jyldamdyǵyn baqylaý múmkin bolmaı turǵanyn aıtty.

Aıta keteıik, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine jol júrisin uıymdastyrý máseleleri boıynsha ózgerister men tolyqtyrýlar engizý týraly» Zańy maquldandy.

«Elektrondyq samokat» uǵymy engizilip, ol eń joǵary konstrýktıvtik jyldamdyǵy saǵatyna 25 kılometrden aspaıtyn kólik quraly dep tanylady jáne olardyń qozǵalysy úshin tıisti oryndar aıqyndaldy.

Atap aıtqanda, Zańmen engizilgen sharttar men tyıymdardy saqtaı otyryp, joldyń júris bóliginiń oń jaq sheti boıynsha elektr samokattardyń júrýine ruqsat etiledi. Bul turǵyda júrgizýshiniń 18 jasqa tolýy, kez kelgen sanattaǵy kólik quralyn basqarý quqyǵyna júrgizýshi kýáligi men shlemniń bolýy, al táýliktiń qarańǵy ýaqytynda qozǵalý kezinde basqa kólik quraldarynyń júrgizýshilerine kórinýi úshin tıisti jaryq túsiretin belgilerdi taǵý eskerilgen.

Elektr samokatyna trotýar nemese jaıaý júrginshiler jolymen saǵatyna 6 km-den aspaıtyn jyldamdyqpen júrýine ruqsat etiledi. Shaǵyn elektr kólik quraldary men elektr samokattary júrgizýshileriniń quqyqtary men mindetteri belgilenedi.