Elektr qýatynyń tutynýshylarǵa arnalǵan tarıfi 1 cáýirden keıin qaralady

NUR-SULTAN. QazAqparat – Energetıka mınıstrligi elektr óndirý tarıfiniń ósýi basqa tarıfterdi qambattatýy múmkin ekenin joqqa shyǵarmaıdy, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken baspasóz máslıhatynda Energetıka mınıstrliginiń ókilderine túpki tutynýshylardyń tarıfi týraly saýal qoıyldy. BAQ ókilderi elektr qýatyn óndirý tarıfiniń artýy kommýnaldyq tarıfterdiń barlyǵyn kóterip jiberýi múmkin be degen alańdaýshylyq bildirdi. Vıtse-mınıstr Qaırat Rahımov ondaı ózgeris bolýy múmkin ekenin joqqa shyǵarǵan joq.

«Buǵan deıin aıtq a nymdaı, tutynýshy tarıfteriniń ósýi basqa ókiletti organnyń quzyryndaǵy sharýa. Sondyqtan ol organnyń atynan tikeleı jaýap bere almaımyn. Óz atymnan aıtar bolsam, energııa óndirýshi kompanııalarda tarıftiń ósýi tabıǵı monopolııalardyń basqa túrlerinde tarıfti kóterýi múmkin. Biraq árbir jaǵdaı boıynsha, árbir sýbekt boıynsha, jylý energııasyn jetkizýshi bolsyn, sýmen qamtamasyz etýshi bolsyn, ókiletti organ jeke-jeke qarap, elektr energııasynyń shyǵyny jalpy shyǵynynyń qansha paıyzyn quraıtynyna qaraı tarıf ózgertý týraly sheshim qabyldanady», - dedi vıtse-mınıstr.

Al osy vedomstvoǵa qarasty elektr energetıkasyn damytý departamentiniń dırektory Aıdos Dáribaev 1 sáýirden bastap elektr qýatynyń túpki tutynýshylarǵa arnalǵan tarıfi qaıta qaralatynyn jetkizdi.

«Energetıka mınıstrligishekti tarıfterdi bekitedi. Al túpki tutynýshylarǵa arnalǵan elektr energııasynyń tarıfterin belgileýge Ulttyq ekonomıka mınıstrliginiń Monopolııalardyń retteý komıteti quzyrly. 1 sáýirden bastap shekti tarıfter bekitilgennen keıin, jańaǵy komıtet túpki tutynýshylarǵa arnalǵan elektr tarıfin qaıta qaraıdy», - dedi departament basshysy.