Elektr energııasy boıynsha kórshi elderge táýeldi bolmaýymyz kerek - Toqaev

ASTANA. QazAqparat – Memleket basshysy otandyq elektr energııasy salasyn jańartý kerektigin málim etti, dep habarlaıdy QazAqparat tilshisi.

«Jalpy, Qazaqstan elektr energııasymen qamtýda ımportqa, kórshi elderge táýeldi bolmaýy tıis. Qazir bolyp jatqan jaǵdaıǵa barlyq jaǵynan, eń aldymen memlekettiń qaýipsizdigi turǵysynan qaıta qaraý qajet», - dedi Qasym-Jomart Toqaev Qazaqstan halqyna Joldaýynda.

Sondaı-aq, Prezıdent jańartylatyn energetıka jobalaryn iske asyrý jalǵasatynyn aıtty.

«Gıdroelektrostantsııalardyń damýyna erekshe nazar aýdarý qajet. Energııamen, jylýmen jáne sýmen jabdyqtaý - birtutas tehnologııalyq ózara baılanysty júıe. Oǵan ekonomıkanyń jeke mańyzdy salasy retinde qaraý kerek. Qazirgi tásil eskirgen. Endi jańa sheshimder qajet», - deıdi Memleket basshysy.

Buǵan deıin Qasym-Jomart Toqaev tarıf saıasatyn túbegeıli qaıta qaraýdy usynǵan edi.

Odan bólek, Prezıdent aldaǵy bes jylda keminde 14 gıgavattyq jańa elektr qýaty iske qosylatynyn aıtty.