Eldos Smetovke jerlesteri Lexus 600 kóligi men 5 bólmeli páter syılady
Eldostyń jattyqtyrýshysy Ǵalymjan Jylgeldıevke de Hyundai Santa Fe avtokóligi men 2 bólmeli páter kiltin syılandy. Baǵaly kólikter men páterler óńirdegi kásipkerlerdiń demeýshiligimen Olımpıada chempıony men bapkerine arnaıy alynǵan.
«Jaqynda ǵana Parıjde ótip jatqan 33-shi jazǵy Olımpıada oıyndarynda elimiz tarıhı jeńiske qol jetkizdi. Bul jeńis jambyldyqtardyń ǵana emes, barsha qazaqstandyqtyń mártebesin asqaqtatty. El balasy Eldos Smetov dzıýdo sporty boıynsha Táýelsiz Qazaqstannyń tarıhynda tuńǵysh Olımpıada chempıony atanyp otyr. Danqty sportshy Jaqsylyq Úshkempirov aǵamyzdan keıin birde-bir qazaq balasy bul bıikti baǵyndyrǵan emes. Araǵa 44 jyl salyp Eldos Smetov qazaqtyń osy arman-maqsatyna qol jetkizdi. Osy sátte, Áýlıe ata óńiri – chempıondar ólkesi, myqty bapkerler ordasy degim keledi. Sondaı-aq, Qasıetti Jambyl jeri – er Eldostyń jeńisinen keıin jaýyryny jer ıiskemegen palýandardyń astanasy desek qatelespeımiz. Qazaq sportynyń, Jambyl sportynyń dańqy arta bersin! Elimizdiń kók baıraǵy bıikten jelbireı bersin!» - dedi stadıonda sóılegen sózinde oblys ákimi.
Saltanatty keshte «Alashuly» toby, ADAM, Turar, Kalifarniya jáne Ernar Aıdar syndy estrada juldyzdary óner kórsetti.
Buǵan deıin jambyldyqtar Eldos Smetovti Taraz qaqpasynan kútip alǵanyn habarlaǵan bolatynbyz.