Eldos Smetov jaraqatyna baılanysty Qazaqstan Barysy Grand Slam týrnırine qatyspaıdy

ASTANA. QazAqparat – BAQ ókilderiniń qatysýymen ótken brıfıngide Qazaqstan dzıýdo federatsııasynyń bas hatshysy Ashat Jitkeev Eldos Smetovtiń «Qazaqstan Barysy Grand Slam» týrnırine nege qatyspaıtynyn túsindirdi, dep habarlaıdy QazAqparat tilshisi.

«Ózderińiz biletindeı, Eldos Smetov Tashkent qalasynda kúresken ýaqytta jaraqat alǵan bolatyn. Keıin jyldyń aıaǵynda Masters týrnırinde kúreskende qaıta jaraqat aldy. Bıyldan bastap federatsııanyń qoldaýymen Eldos Smetov em alyp jatyr. Buǵan deıin Parıjde, qazir elimizde emdelip jatyr. Ol jeke jospary boıynsha Almatyda daıyndalyp jatyr. Kópshilik «Eldos nege kúrespeıdi?» dep surap jatyr. Ol bul jarysqa qatyspaǵanymen, quramamen birge. Ol tamyz aıynda ótetin Masters týrnırine daıyndalyp jatyr», - dep toqtaldy Ashat Jitkeev.

Federatsııasynyń bas hatshysy Eldos Smetov keler jyly Parıjde ótetin olımpıada oıyndaryna qatysyp, chempıon atanýy múmkin dep boljam jasady.

Eske salaıyq, birer kún buryn «Qazaqstan Barysy Grand Slam» jarysynda Qazaqstan quramasynyń atynan óner kórsetetin sportshylardyń tizimi jarııalandy. Olardyń arasynda olımpıada oıyndarynyń eki márte júldegeri Eldos Smetov joq. Osyǵan baılanysty sportshynyń jankúıerleri onyń bul saıysqa qatyspaýyna qatysty túrli pikir aıta bastaǵan edi.

Qosa ketsek, 16-18 maýsym aralyǵynda Astanada dzıýdodan «Qazaqstan Barysy Grand Slam» týrnıri ótedi.