Eldos Smetov: Memlekettik qyzmetke barmaımyn, taǵy bir Olımpıadaǵa qatysamyn
E. Smetov «Jyldyń úzdik sportshysy» ataǵyn 2-3 ret alǵanyn aıtty.
– Ár adamnyń óziniń súıikti isi bolady. Mysaly men 5 jasymnan beri osy sportpen aınalysyp kelemin, odan bir nátıje shyǵarǵym keledi, eń bıik shyńyna shyqqym keledi. Shyqqan adamdarǵa qaraımyn, olardaı bolý úshin ne isteý kerek dep kóp zertteýler jasadym. Bul shyńǵa da shyqtyq, biraq adamı qasıetti joǵaltyp almaý kerek. Baıaǵy Eldos – sol Eldos, tek Olımpıada chempıony degen atty ıelendik. Ómirdegi basty maqsat – dúnıe men ataq jınaý emes, adam bolyp qalý, - dedi sportshy tilshilerge bergen suhbatynda.
Sonymen birge, «Eldos Smetovty memlekettik laýazymda kórýimiz múmkin be?» degen suraq qoıyldy.
– Qazirgi ýaqytta ondaı maqsatym joq, ózimdi ol jaqta kórip turǵan joqpyn. Óıtkeni men áli sportshymyn, sportshy retinde alǵa qoıǵan maqsatym bar. Sol maqsatpen múmkindigim bar kezde aınalysýym kerek. Qazir 32 jastamyn, Olımpıada ýaqytynda 35-36 jasta bolamyn. Bul jasta «júlde alý múmkin emes» dep úmit úzýge bolmaıdy, oǵan dálel bolǵan – Demeý Jadyraev, ol 35 jasynda Olımpıada fınalyna deıin jetti. Bir qazaq shyqqan bıikke ekinshi qazaq ta shyǵa alady. Mundaǵy maqsat – jas degenniń aýysyp jatqan tsıfrlar ǵana ekenin dáleldeý, jastarǵa múmkin emes nárseniń joq ekenin dáleldeý. Ásirese úshinshi Olımpıadam – biraz jasqa úlken motıvatsııa berdi, kúresti qoıyp ketkender kilemge oraldy, dıýzdo zalynan bapkerler habarlasyp, kishkentaı balalar syımaı jatqanyn aıtýda. Buryn «Qazaqqa dzıýdodan Olımpıada chempıony bolý buıyrmaǵan, múmkin emes dep oılaıtyn edim. Biraq bul múmkin eken, - dep jaýap berdi Eldos Smetov.
Sonymen birge, sportshy aǵylshyn tilin úırenýge Anglııaǵa baratynyn, 2027 jyly Qazaqstanda ótetin álem birinshiligine, 2028 jyly Los-Andjeles qalasynda ótetin Olımpıadaǵa qatysatynyn aıtty.
– Baǵyma buıyryp jatsa, baramyn, buıyrmaı jatsa, baýyrlarymdy qoldaýǵa baramyn. Maman bolsam da sporttan alystap ketpeımin. Óıtkeni kishkentaıymnan sportpen aınalystym, osy saladaǵy kemshilikterdiń ornyn toltyryp, tájirıbemdi jastarmen bóliskim keledi, - deıdi E. Smetov.
Aıta keteıik, Týrızm jáne sport mınıstrligi jyl saıynǵy «Úzdik» premııasynyń jeńimpazdaryn marapattady. Jeńimpazdar qatarynda Parıj olımpıadasynyń chempıondary, aýyl mamandary jáne úzdik sport uıymdary bar.