Eldos óz esimin sport tarıhyna altyn árippen jazdy – Ermek Marjyqpaev

<p>PARIJ. KAZINFORM &ndash; Parıj Olımpıadasynda sportshylarymyzdy qoldaýǵa kelgen QR Týrızm jáne sport mınıstri Ermek Marjyqpaev Eldos Smetovtiń jeńisinen keıin Kazinform tilshisine shaǵyn suhbat berip, óz oıymen bólisti.</p>

— Ermek Boranbaıuly, búgin Eldos baýyrymyz Olımpıada chempıony atandy. Siz chempıon bolady dep kúttińiz ba?

— Árıne, Eldostan bárimiz altyn kúttik. Búkil el bolyp oǵan senim artty. Mine, ózderińiz kórgendeı ol búgin esimin qazaq sporty tarıhyna altyn árippen jazdy.

— Taǵy kimderge úmit artamyz? Alda taǵy kimder osyndaı altyn júldemen qýantady?

— Bizde búgin Olımpıadanyń alǵashqy kúni. Bir altyn, bir qolaǵa qol jetkizip jatyrmyz. Negizgi jarystardyń barlyǵy alda. Boksshylarymyz, balýandarymyz jarysty endi bastaıdy. Basqa da sportshylarymyz Olımpıadany bastaǵan joq. Sondyqtan, alda áli talaı medaldar kútip tur dep senimmen aıta alamyn. Eldostyń altyny «betashar altyn» boldy dep esepteımin. Bul ózge sportshylarymyzǵa juǵysty bolsa eken dep tileımin.

— Eldosty osy jeńisinen keıin qandaı syı-qurmet, syıaqy kútip turǵanyn aıta ketseńiz?

— Eldosqa qandaı syı-qurmet kórsetsek te jarasady. Ol búginnen bastap naǵyz eldiń erke balasy bolady. Ózderińiz bilesizder, Olımpıada chempıondary men júldegerlerine memleketten arnaıy qarastyrylǵan syıaqy bar. Chempıondar 250 myń, kúmis júldegerler 150 myń, qola júldegerler 75 myń AQSh dolarymen marapattalady.

— Ábıba Ábýjaqynovanyń jeńilisine qatysty oıyńyzdy bilsek…

— Ábýjaqynova óte talanytty sportshy. Ol osyǵan deıin talaı dodalarda el abyroıyn bıikten kórsete bildi. Bul — jarys, bul — Olımpıada. Sondyqtan, jeńis pen jeńilis qatar júredi. Sportshymyz qolda turǵan qolany ýysynan shyǵaryp aldy. Sál sáttilik jetispeı qaldy.

— Áńgimeńizge rahmet!