Eldos ekeýmiz besik qudamyz, ol meniń kishkentaı qyzyma syrǵa salyp qoıǵan — Ǵusman Qyrǵyzbaev

<p>PARIJ. KAZINFORM &mdash; Osydan bir kún buryn Parıjde ótip jatqan Olımpıada oıyndarynda dzıýdodan qola medal jeńip alǵan Ǵusman Qyrǵyzbaev Eldos Smetov ekeý bir-birine besik quda ekenin aıtyp berdi.</p>

«Eldos ekemiz bir-birimizge qudamyz. Bir kúni Eldos áıel balasymen úıime qydyryp keldi. Áńgime arasynda Eldos maǵan «ekeýmiz qanshama ýaqyttan beri birge kúresip, birge kele jatyrmyz. Qaıda barsaq ta birge baramyz. Oqý-jattyǵý jıyndaryna da, jarystarǵa da birge attanamyz. Aramyzdan qyl ótpesteı dospyz. Birdeme aıtsam renjip qalmaısyń ba» dedi. Kóńilimde eshteńe joq, berden «aıta ber, renjimeımin» dedim. «Ekeýmizdiń dostyǵymyz máńgilik bolsyn. Sende qyz bar, mende ul bar. Seniń qyzyńa ulymdy qazaqy dástúrmen atastyrǵym kelip otyr. Búgingi dostar bolashaqta quda-qudaǵı bolaıyq» dedi. Aýyzym ashylyp, kózim baqyraıyp turyp qaldym. Ol maǵan «sol kúnge jetkizsin demeısiń ba? Men syrǵamdy alyp keldim» dep qyzyma syrǵa taqty. Osylaı ekeýmiz qazir bir-birimizdi kórsek «qudeke» dep sóılesemiz», — dedi Ǵusman Qyrǵyzbaev Kazinform tilshisine.

Esterińizge sala keteıik, keshe Qyrǵyzbaev Parıj Olımpıadasynda 66 keli salmaqta qola medal jeńip alǵan bolatyn.