Eldiń túkpir-túkpirinen kelgen Ulttyq quryltaı músheleri Astanada bas qosty

<p>ASTANA. KAZINFORM — Memlekettik keńesshi Erlan Qarın óńirlerdegi qoǵamdyq keńesterdiń quramyna kiretin ulttyq quryltaı múshelerimen kezdesý ótkizdi.</p>

Basqosýda Erlan Qarın Memleket basshysy ulttyq quryltaıdyń qyzmeti aıasynda kótergen mańyzdy bastamalardyń júzege asyrylýyna toqtaldy.

Sonyń ishinde áıelder men balalardyń quqyqtaryn qorǵaýǵa, veıpterge tyıym salýǵa, lýdomanııaǵa, vandalızmge qarsy kúreske qatysty birqatar zańnyń qabyldanýyn jáne basqa da máselelerdi atap ótýge bolady.

Sonymen qatar Memlekettik keńesshi Prezıdent Qasym-Jomart Toqaevtyń tapsyrmasymen Birtutas tárbıe baǵdarlamasy ázirlenip, mektepterge jappaı engiziletinin atap ótti.

Sondaı-aq Erlan Qarın azamattyq ınstıtýttardy, ásirese, óńirlerdegi azamattyq sektordy damytýdyń mańyzdy ekenine nazar aýdardy. Bul rette qoǵamdyq keńester aıryqsha ról atqarady.

Óz kezeginde Ulttyq quryltaıdyń aımaqtardan kelgen músheleri óńirlerdi órkendetýge qatysty ózekti máselelerge toqtaldy. Sonymen qatar jergilikti halyqpen jáne qoǵamdaǵy toptarmen ózara qarym-qatynas ornatýdyń ádis-tásilderi týraly oı-pikirlerin jetkizdi.

Budan bólek Ulttyq quryltaıdyń músheleri pikir almasý barysynda Memleket basshysynyń Qazaqstan halqyna arnaǵan Joldaýynda aıtylǵan bastamalarǵa qoldaý bildirdi.

Jıyn sońynda Memlekettik keńesshi aldaǵy ýaqytta ulttyq quryltaı múshelerimen taǵy da birqatar kezdesý ótetinin aıtty.