Eldiń 10 aıdaǵy ekonomıkalyq ósimi 4,9% boldy

<p>Ulttyq ekonomıka mınıstri Álibek Qýantyrov qańtar-qazan aılarynda Qazaqstan ekonomıkasy 4,9% ósim kórsetkenin málim etti, dep habarlaıdy <a href="https://kaz.inform.kz/" target="_blank" rel="noopener">Kazinform </a>agenttigi .</p>

«Qańtar-qazan aılarynyń qorytyndysy boıynsha Qazaqstan ekonomıkasynyń ósý qarqyny 4,9% boldy. Onyń ishinde naqty sektor – 3,8%, al qyzmet kórsetý salasy – 5,4% ósti. Salalar arasynda eń joǵary ósýdi qurylys, saýda, aqparat jáne baılanys, sondaı-aq kólik kórsetti. Negizgi kapıtalǵa salynǵan ınvestıtsııalardyń ósý qarqyny 12,6% boldy. Investıtsııalar aǵyny kólik jáne qoımalaýda – 58%, densaýlyq saqtaýda – 40%, saýdada – 38%, bilim berýde – 18%, aýyl sharýashylyǵynda – 8,7%, ónerkásipte – 8,3% ósti», - dedi mınıstr.

Álibek Qýantyrov óńirler arasynda eń joǵary ósim Mańǵystaý, Abaı, Túrkistan jáne Pavlodar oblystarynda baıqalǵanyn atap ótti.

«Aldyn ala qorytyndy boıynsha 2023 jylǵy qańtar-qyrkúıekte syrtqy saýda taýar aınalymy 2,4% ósip, 102 mlrd dollardy qurady. Eksport 57 mlrd-tan astam dollardy qurap, onyń ishinde óńdelgen taýarlar eksporty 18 mlrd dollarǵa jetti. Taýarlar ımporty 44 mlrd-tan astam dollardy qurady. Jalpy, oń saýda balansy 13 mlrd dollarǵa teń», - dedi Ulttyq ekonomıka mınıstri.