Eldiń tehnologııalyq egemendigin qamtamasyz etýge basymdyq berilip otyr – sarapshy Prezıdent Joldaýy jaıynda

BІShKEK. QazAqparat – Memleket basshysy Qasym-Jomart Toqaev Qazaqstan halqyna Joldaýynda ındýstrııanyń tutas keshenin damytýdyń naqty tetikterin usyndy. Eldiń tehnologııalyq egemendigin qamtamasyz etýge ekpin qoıylyp otyr. Mundaı pikirdi qyrǵyz saıasattanýshysy, «Berdakov Online» Telegram arnasynyń avtory Denıs Berdakov bildirdi, dep habarlaıdy QazAqparat tilshisi.

Sarapshynyń pikirinshe, Joldaýda alǵash ret ónerkásiptik baǵdarlama men jańa áleýmettik-ekonomıkalyq tártipti qısyndastyrý týraly aıtyldy. Halyqtyń ómir súrý deńgeıi men sapasyn arttyrý maqsatynda naqty naryqtyq qarjylandyrý negizinde ǵylymı-zertteý ınstıtýttarymen baılanystyra otyryp, agroónerkásiptik holdıngterden taý-ken óndiristerine deıingi ındýstrııanyń tutas keshenin damytý boıynsha naqty tetikter usynyldy.

«Qazaqstan árqashan jan basyna shaqqandaǵy altyn-valıýta rezerviniń orasan zor kórsetkishteri bar óńirdegi eń baı el boldy. Shıkizatqa ıe bolyp otyrǵan elde buryn óńdeý jáne ǵylymdy qajet etetin óndiris damymaǵan. Endi alǵash ret áskerı jáne azyq-túlik egemendigin beretin eldiń tehnologııalyq egemendigin qamtamasyz etýge basymdyq berilip otyr. Mundaı saıasat óte mańyzdy. Qaıta óńdeý ónerkásibiniń shaǵyn jáne orta klasyn qura otyryp, Qazaqstan óz resýrstarynyń arqasynda ónerkásipke de, búkil óńir halqyna da qajetti qaıta óńdeýdiń ártúrli dárejedegi taýarlarmen toltyra alady. Bul búkil Ortalyq Azııanyń tehnologııalyq egemendigine aparatyn jol. Muny isteý ońaı bolmaıdy. Biraq eń bastysy - shıkizat, saıası erik-jiger, qarjy, sondaı-aq beıresmı Ortalyq Azııa odaǵynyń qalyptasýyna baılanysty salystyrmaly túrde qorǵalǵan ótkizý naryqtary bar», - deıdi saıasattanýshy.

Sarapshy Joldaýda qozǵalǵan mańyzdy máselelerdiń biri sý resýrstarynyń qoljetimdiligi men sapasy problemasynyń mańyzdylyǵy ekendigin atap ótip, Qazaqstanda jańa Sý resýrstary jáne ırrıgatsııa mınıstrliginiń qurylýyna oń baǵa berdi.

«Sý – bul Ortalyq Azııadaǵy aldaǵy 50-70 jyldaǵy basty qaýip. Óńirde sý resýrstary olardy óte oryndy maqsatta paıdalanǵan jaǵdaıda ǵana jetkilikti bolady. Sala sýdy únemdeıtin tehnologııalary bar qýatty sý qoımalaryn salý, tamshylatyp sýarý júıelerin engizý, ǵylymı zertteýler arqyly tuqymnyń jańa túrlerin engizý, ylǵal súıgish daqyldardy az ósirý sııaqty sý obektilerin tıimdi paıdalanýdyń jańa tetikterin talap etedi. Munyń bárine kapıtal qajet. Sonymen birge ol aımaqtyń saıası jáne ekonomıkalyq birligin, onyń jalpy baılanysyn qamtamasyz etedi. Sý sharýashylyǵy sektoryna qoıylǵan mindetterdi iske asyrýmen salanyń bilikti mamandarymen jasaqtalǵan derbes vedomstvo aınalysýy tıis. Qol jetkizilgen memorandýmǵa sáıkes, Qazaqstan men Ózbekstan taıaý jyldary Qambarata GES-1 qurylysy jobasyna jáne búkil Ortalyq Azııaǵa sýdy saqtaýǵa, ony kúzgi-qysqy kezeńderde aımaqty kóktem mezgilinde aýyz sýmen jáne sýarmaly sýmen qamtamasyz etý úshin jınaqtaýǵa múmkindik beretin birqatar basqa jobaǵa eleýli qarjy salýdy bastaıdy dep úmittenemiz», - dedi ol.