Eldiń qaı aımaqtary balalar úshin áleýmettik turǵydan qolaısyz sanalady

ASTANA. QazAqparat – Oqý-aǵartý mınıstrligi «Balalardy zorlyq-zombylyqtan qorǵaý, sýıtsıdtiń aldyn alý, olardyń quqyqtary men salamattyǵyn qamtamasyz etý jónindegi 2023-2025 jyldarǵa arnalǵan keshendi jospardy» ashyq talqyǵa shyǵardy, dep habarlaıdy QazAqparat tilshisi.

Vedomstvo esebi boıynsha byltyr Qazaqstandaǵy balalar sany - 6 616 774.

Onyń ishinde 3,7 mln-nan astamy oqýshy bolsa, 2,5 mln - mektep jasyna deıingi búldirshinder, al 400 myńnan astamy - kolledj stýdentteri.

«Jaǵdaı jasaýdyń júıeli monıtorıngi, sondaı-aq problemalardy ýaqtyly anyqtaý jáne sheshimderdi jedel qabyldaý úshin byltyr 56 ındıkatordan turatyn balalardyń ál-aýqatynyń ındeksi qabyldandy. 2021 jyldyń qorytyndysy boıynsha balalardyń ál-aýqatynyń ortasha baǵasy respýblıka boıynsha 55,3 baldy quraıdy. Almaty qalasy Qazaqstandaǵy balalar úshin eń qolaıly óńir sanalady (63,3 ball), kelesi orynda – Qyzylorda (62,1 ball) jáne Aqtóbe oblysy (59,9 ball). Qostanaı (49,7 ball), Batys Qazaqstan (47,4 ball) jáne Aqmola (43,8 ball) oblystary qolaısyz óńirler sanatynda» delingen qujatta.

Oqý-aǵartý mınıstrliginiń málimetinshe, jyl saıyn 3 myńnan astam jasóspirim men 6,4 myńnan astam turmysy nashar otbasy ishki ister organdarynyń esebine alynady.