Eldiń baılyǵy men tabysyn azamattar arasynda ádil bólýimiz qajet – Prezıdent

ASTANA. QazAqparat – 2029 jylǵa qaraı ulttyq ekonomıkanyń kólemin 450 mıllıard dollarǵa deıin eki ese ulǵaıtý maqsaty qoıyldy. Bul týraly Prezıdent Qasym-Jomart Toqaev Parlament palatalarynyń birlesken otyrysynda Qazaqstan halqyna Joldaýynda aıtty, dep habarlaıdy QazAqparat tilshisi.

«Elimizdiń ekonomıkasyn damytýǵa qatysty búgin aıtylǵan joba-jospardyń bári naqty zerttelip, eseptelip jasaldy. Búkil ekonomıkalyq júıeni shuǵyl túrde túbegeıli qaıta qarap, ózgertý arqyly elimizdi órkendetemiz, halyqtyń ál-aýqatyn arttyramyz. Reformanyń basty maqsaty – ekonomıkamyzdyń turaqty ósimin 6-7 paıyzǵa jetkizý jáne 2029 jylǵa qaraı ulttyq ekonomıkanyń kólemin 2 esege ulǵaıtý, ıaǵnı 450 mıllıard dollarǵa jetkizý», - dedi Qasym-Jomart Toqaev.

Prezıdent munyń aýqymdy ári kúrdeli mindet ekenin atap ótti.

«Biraq biz elimizdiń baılyǵyn, tabysyn azamattarymyzdyń arasynda ádil bólýimiz qajet. Bir sózben aıtqanda, ekonomıkalyq ósimniń ıgiligin árbir azamatymyz kórýi kerek. Bul – prıntsıpti másele. Elimizdiń bolashaǵy baıandy bolsyn desek, bul strategııalyq mindetti qalaıda oryndaýǵa tıispiz. Men elimizdiń damý baǵdary týraly paıymdarymdy únemi aıtyp júrmin. Sony taǵy da qaıtalaǵym keledi. Biz bolashaqta qandaı el bolatynymyzdy naqty bilemiz. Bárine birdeı múmkindik beretin órkenıetti el – Ádiletti Qazaqstandy quramyz», - dedi Memleket basshysy.