Eldiń batysyndaǵy turǵyndar saılaýda óz tańdaýyn jasaýda

ORAL. QazAqparat – Elimizdiń bolashaǵy jarqyn bolsyn! Bul týraly búgin H.Dospanova atyndaǵy №30 orta mektepte ornalasqan №435 saılaý ýchaskesinde alǵash ret daýys bergen 18 jastaǵy Nursát Habıbýlla málim etti, dep habarlaıdy QazAqparat tilshisi.

Onyń aıtýynsha, ózi M.Ótemisov atyndaǵy Batys Qazaqstan ýnıversıtetiniń jaratylystaný-geografııa fakýltetiniń 1 kýrsynda oqıdy.

«Men ýnıversıtette hımııa jáne bıologııa pániniń muǵalimi mamandyǵy boıynsha bilim alyp jatyrmyn. Keleshekte ustaz bolyp, shákirtterge dáris berip, óz elimizdiń damyp, odan ári órkendeýine úles qosqym keledi. Búgin birinshi bolyp, óz tańdaýymdy jasadym. Bul saılaýdyń elimiz ómirindegi mańyzy zor ekendigin túsinemin. Saılaý ýchaskesinde bizge syılyqtar berilip, kóje-baýyrsaqtan dám tattyq», dedi QazAqparat tilshisine Nursát Habıbýlla.

Ýchaskelik saılaý komıssııasynyń tóraǵasy Gúlshat Bısenǵalıevanyń sózine qaraǵanda, atalǵan ýchaskede barlyǵy 2377 saılaýshy tirkelgen. 13 adam úıden daýys bermekshi. Saılaý barysy qalypty ótýde, ony baıqaýshylar qadaǵalaýda.

Osy mektepte ornalasqan №410 saılaý ýchaskesinde 18 jastaǵy Gaýhar Syrym alǵash ret daýys berdi. Oǵan jáne ýchaskege birinshi bolyp, daýys bergenderge eskertkish syılyqtar tabys etildi.

«Daýys berý ádettegideı ýaqytymen bastaldy. Bizdiń ýchaskede 2652 saılaýshy tirkelse, sonyń 20-sy úıden óz tańdaýlaryn jasaıdy. Saılaý barysyn baıqaýshylar baqylap otyr», dedi ýchaskelik saılaý komıssııasynyń tóraǵasy Raıgúl Imanǵalıeva.

Eske sala keteıik, budan buryn BQO-da bir mandattyq okrýgter boıynsha 543 kandıdat tirkelgenin jazǵan bolatynbyz.