Eldiń batysynda respýblıkalyq joldar qurylysy qalaı júrip jatyr
A.Ydyrysov Aqtóbe men Atyraý oblystarynda jumys saparymen bolyp, jalpy uzyndyǵy 722 shaqyrymdy quraıtyn «Aqtóbe-Qandyaǵash», «Qandyaǵash-Maqat» jáne «Atyraý-Astrahan» (Reseımen shekara) joldaryndaǵy qurylys jumystarynyń barysyn tekserdi.
Aqtóbe oblysynda Almaz Ydyrysov «Aqtóbe-Qandyaǵash» jolynyń qaıta jóndeý jumystarymen tanysyp, Temir aýdanynyń Shubarqudyq aýylynda jergilikti atqarýshy organdar, qurylysty qadaǵalaý jónindegi keńesshiler, merdigerlik uıymdar ókilderiniń qatysýymen jıyn ótkizdi. Jolǵa qatysty týyndaǵan máseleler men suraqtar qarastyrylyp, jergilikti halyq óz usynystaryn jetkizgen. Bul joba boıynsha joldyń qurylymdyq qabattaryn salý jumystary áli de jalǵasyp jatyr. Sol sebepti vıtse-mınıstr qurylys jumystarynyń qarqynyn jedeldetýdi jáne jumysty belgilengen merzimge deıin sapaly aıaqtaýdy tapsyrdy.
Sonymen qatar vıtse-mınıstr Atyraý oblysy Jamansor aýylynda óndiristik bazada 7 lotty qamtıtyn jáne jalpy 304 shaqyrymdy quraıtyn «Qandyaǵash-Maqat» jobasy boıynsha jıyn ótkizdi. Al «Atyraý-Astrahan» jobasynyń qurylys-montajdaý jumystaryn talqylaý úshin arnaıy jıyndy Aqqystaý óńiri men Isataı stantsııasynda ótkizdi. Jıyn barysynda jergilikti merdiger uıymdardyń ókilderi qurylys jumystaryna qajetti ınertti materıaldardy oblysqa ýaqytyly jetkizýde qıyndyqtyń baryna toqtaldy. Osyǵan oraı Almaz Ydyrysov «QazAvtoJol» ulttyq operatoryna bul máseleni tez arada sheshýdi júktedi.
Budan bólek, mınıstr orynbasary Atyraý oblysynyń ákimi Serik Shapkenovpen kezdesip, jumys sapary barysynda týyndaǵan máselelerdi talqylady.
Aıta keteıik, 2019-2021 jyldar aralyǵynda «Atyraý-Astrahan» avtojolynyń birinshi kezeńinde Reseımen shekaradan bastap, Ganıýshkıno aýylyna deıin 60 shaqyrym jol qaıta jóndelgen. Al qazirgi kezde qaıta jóndeý jumystary uzyndyǵy 217 shaqyrymdy quraıtyn ýchaskelerde júrgizilip jatyr.