Eldik sheshimderdiń halyq kóńilinen shyǵatyny anyq - Abat Qydyrshaev

ORAL. QazAqparat - Keshe bılik tarmaqtary arasynda ókilettikterdi qaıta bólý máseleleri jónindegi jumys tobynyń otyrysyna qatysqan Elbasy Nursultan Nazarbaev Negizgi zańǵa engiziletin ózgeristerdiń elimizdiń damýyna erekshe serpin beretinin atap ótti. Memleket basshysy sonymen qatar 26-baptyń ózgerissiz qalatynyn jetkizip, halyqtyń kúpti kóńilin ornyna túsirdi. Shyndyǵynda eldiń múddesin kózdeıtin mańyzdy sheshimder ǵana halyq kóńilinen shyǵatyny anyq. Bul týraly M.Ótemisov atyndaǵy Batys Qazaqstan memlekettik ýnıversıteti janyndaǵy «Mahambet» gýmanıtarlyq zertteýler ınstıtýtynyń dırektory, pedagogıka ǵylymdarynyń doktory, professor Abat Qydyrshaev málim etti, dep habarlaıdy «QazAqparat» HAA tilshisi.

Onyń aıtýynsha, Elbasy jarııalaǵan saıası reformanyń memlekettilikti nyǵaıtýǵa, bılik tarmaqtary qyzmetiniń tıimdiligi men jaýapkershiligin arttyrýy zańdy. Memleket basshysy usynǵan jańa baǵyttyń memleketimizdi odan ári nyǵaıtýǵa jáne bıliktiń barlyq tarmaqtaryn odan ári kúsheıtýge arnalýy qýantady. Kúshti prezıdenttik bılikti saqtaı otyryp júrgiziletin mundaı reforma - elimizdegi saıası turaqtylyq pen odan ári ósip-órkendeýimizdiń berik kepili. Aqıqatty sol demokratııalandyrýdy jalǵastyrý, Parlamenttiń ókilettigin keńeıtý, memlekettik organdardyń halyq pen qoǵam aldyndaǵy eseptiligin qamtamasyz etý - qashan da  basty qaǵıdatymyz.

«Elbasy qoǵam aldyna ýaqyt talaptaryna saı jańa mindetter qoıa bildi. Budan burynǵy Úndeýinde aıqyn aıtylǵanyndaı, biz úshin saıası partııalardyń rólin kúsheıtý máselesi asa mańyzdy. Eger Úkimet qurylymy men quramy saılaýda jeńgen partııanyń artyqshylyǵy boıynsha jasaqtalatyn bolsa, bul - barlyq partııalar úshin bıliktiń ókiletti organdarynda ǵana emes, basqa organdarynda da bolýǵa degen úlken múmkindik kózi. Al munyń barlyǵy halyq múddesi úshin, elimizdiń bolashaq damýy úshin qolǵa alynǵan bes ınstıtýttyq reformaǵa sáıkes kelmek. Sondaı-aq, bul - eldiń taǵdyryna qatysty máselelerdi tereńdetýde alýan uıym ujymdarynda halyq tarapynan aıtylǵan usynys-pikirlerdiń jınaqtalýynyń qajettiligi. Endi osyǵan siz ben biz uıytqy bolýymyz kerek, barshamyz osy tusta  azamattyq  ustanymymyzdy  tanytqanymyz abzal.

Túsine bilsek, Memleket basshysynyń Parlamenttiń ókilettigin kúsheıtý, Úkimettiń jaýapkershiligin arttyrý týraly bastamasy - Qazaqstanda turaqtylyq pen beıbitshilikti qamtamasyz etýge qomaqty qosymsha kúsh darytpaq. Elbasymyzdyń memlekettilikti nyǵaıtýǵa, respýblıkamyzdy odan ári saıası, ekonomıkalyq jáne áleýmettik jańǵyrtýǵa arnalǵan eldik baǵytyn tolyǵymen qoldaý oryndy. Memleket basshysynyń qazirgi zamannyń jahandyq jáne óńirlik qaýip-qaterlerine sáıkesti áreket etý qajettiligi týraly ustanymy qoldaýǵa laıyq.                  

Qazaqstan Prezıdenti saıası júıeni odan ári demokratııalandyrý úshin memlekettik bılik taraptary arasynda ókilettikterdi qaıta bólý, sondaı-aq «Bes ınstıtýttyq reformany júzege asyrý boıynsha 100 naqty qadam» Ult josparyn iske asyrý jáne elimizdiń álemdegi 30 jetekshi memlekettiń qataryna kirý boıynsha «Qazaqstan-2050» Strategııasynyń maqsattaryna qol jetkizý jóninde usynyp otyrǵan reformasynyń mańyzy erekshe. Úkimettiń ekonomıka salasyndaǵy atqarýshylyq ókilettikteri men derbestiligin keńeıtý jáne onyń jaýapkershiligi men Parlament aldyndaǵy eseptiligin kúsheıtý elimizdiń aldaǵy birneshe jylǵa saıası turaqtylyǵyn qamtamasyz etýge negiz jasaıtyny daýsyz.

QR Prezıdenti N.Á.Nazarbaev memlekettik basqarýdyń zamanaýı, turaqty, utymdy úlgisin qalyptastyrý saıasatyn qarqyndy júrgizýde. Nátıje aıqyn. Elimizde qalyptasqan kásibı Úkimet, qýatty Parlament jáne táýelsiz sot bıligi bar. Demek, engizilgeli otyrǵan Ata zańymyzdaǵy ózgerister - qazaq qoǵamyn jańartyp, jańǵyrtýdyń zańdy jalǵasy. Memlekettik bılik tarmaqtary arasynda ókilettilikterdi qaıta bólý máselesi - el damýynyń zańdy júıeli kezeńi. Bul batyl qadam Parlament pen Úkimettiń ókilettikterin sózsiz arttyrady, árbir qabyldaǵan eldik sheshimderine sáıkesti eselengen jaýapkershilik júkteıdi. Sondaı-aq Qazaqstan Respýblıkasynda halyqtyń birligi men turaqtylyǵyna, memlekettik bılik tarmaqtarynyń rettiligi men  úılesimdi jumysyna, azamattar quqyǵynyń saqtalýyna, memlekettik shekaramyzdyń beriktigi men elimizdiń qorǵanys qabiletiniń konstıtýtsııalyq qorǵalýyna kepildik berer kúshti prezıdenttik bılik saqtalady. Olaı bolsa, Memleket basshysynyń Konstıtýtsııa kepili retinde qabyldaǵan jańa tarıhı sheshimi - qazaq qoǵamyndaǵy saıası turaqtylyq pen ekonomıkalyq qarqyndy damýdyń naqty dáleli. Bul - «Qazaqstan - 2050» baǵdarlamalyq qujatynda belgilengen strategııalyq maqsattarǵa adaldyqtyń aıqyn kórinisi. Qysqasy, konstıtýtsııalyq  ózgerister - tarıhı mán-mańyzy zor oqıǵa. Bul qazaq elin baıandy bolashaqqa jeteleıtin qadam, búgingideı jańaryp, jahandanǵan álemge qatysty jańa kózqaras, eldi demokratııalandyrý jolyndaǵy shynaıy saıası reformalar baǵytynda jasalǵan shıraq irgerileý áreketiniń ozyq úlgisi. Bul - asa sergektilikti qajet eter, memlekettik basqarý júıesin meılinshe teńestirilgen júıege aýystyrýdaǵy der kezinde kóterilgen, osy zamanǵy, qazirgi kúnniń shynaıy kelbetine saı jasalǵan, eldi ozyq jurttar qataryna aparar qaryshty qozǵalys. Demek, bul - el damýynyń jańa sapaly kezeńge aıaq basqanynyń dáleli», dedi «QazAqparat» tilshisine A.Qydyrshaev.