Eldi mekenderdi taza sýmen qamtý kórsetkishi 95 paıyzǵa jetti - Aqtóbe ákimi

NUR-SULTAN. QazAqparat - Aqtóbe oblysynyń aýyldyq eldi mekenderin taza sýmen jáne gazben qamtamasyz etý jumystary qarqyndy júrip jatyr. Bul týraly búgin Ortalyq kommýnıkatsııalar qyzmetindegi baspasóz máslıhatynda Aqtóbe oblysynyń ákimi Ońdasyn Orazalın aıtty, dep habarlaıdy QazAqparat tilshisi.

«Memleket basshysynyń tapsyrmasy aıasynda halyqty taza sýmen qamtamasyz etý máselesin tolyq sheshýge jaqyndap qaldyq. Bıyl bul kórsetkish 95 paıyzǵa jetti. Osy jyly halyqty taza aýyz sýmen qamtamasyz etýge 2,7 mlrd teńge bólinse, kelesi jyly qarjylandyrý kólemi 2,5 ese artyp otyr. Bul - 22 eldi mekenge aýyz sý jetkizetin 27 jobaǵa 6,8 mlrd teńge bólinedi degen sóz. Aldaǵy 1-2 jyldyń ishinde aýyldardy tolyqtaı taza sýmen qamtamasyz etýge múmkinshiligimiz bar», - dedi oblys ákimi.

Óńir basshysynyń dereginshe, bıyl oblys halqynyń 29,4 paıyzy gazben qamtamasyz etilgen. Bul respýblıka boıynsha joǵary kórsetkish deýge bolady. Degenmen oblysta shalǵaıdaǵy eldi mekenderge gaz ótkizý máselesi áli de ózekti.

«Sebebi olar shalǵaıda ornalasqannan keıin gazdandyrý úlken qarajatty qajet etedi. Deı turǵanmen, bolashaǵy bar, áleýeti mol aýyldarǵa gaz jetkizýmen aınalysyp jatyrmyz. Bıyl Úkimettiń qoldaýymen 17 aýyldy gazben jabdyqtaý úshin qosymsha 2,5 mlrd teńge bólindi. Kelesi jyly bul jumys jalǵasyn tabady. 20 eldi mekenge arnalǵan 24 jobaǵa 1,5 mlrd teńge oblystyq bıýdjetten bólinedi. Osylaısha birtindep bul máseleni de sheshemiz»,- dedi O.Orazalın.