Elderdiń áskerı qýattylyq reıtıngisinde Qazaqstan 62-orynda tur

NUR-SULTAN. QazAqparat – Álem elderiniń áskerı qýattylyq boıynsha reıtıngisinde Qazaqstan 140 eldiń ishinde 62-oryndy ıelendi, dep habarlaıdy QazAqparat finprom.kz-ke silteme jasap.

El ındeksi – 1,0286. Reıtınginiń minsiz baǵasy – 0,0000. Indeks máni neǵurlym az bolsa, eldiń jaýyngerlik áleýeti soǵurlym myqty dep sanalady. Tizimde AQSh, Reseı, Qytaı, Úndistan jáne Japonııa kósh bastap tur. Kórshileriniń arasynda Reseı men Qytaıdan basqa, QR-ǵa qaraǵanda Ózbekstannyń áleýeti joǵary.

Sonymen qatar, Túrkimenstan, Qyrǵyzstan sııaqty elder Qazaqstannan artta qalǵan. Býtan, Kosovo jáne Lıberııa reıtıng sońynda tur. Aıta ketý kerek, reıtıngide elderdiń ıadrolyq áleýeti baǵalanbady.

Reıtıng ındeksti anyqtaý úshin áskerı qýattylyq pen qarjydan bastap materıaldyq-tehnıkalyq múmkindikter men geografııaǵa deıingi 50-den astam jeke faktorlardy esepke alǵan.

Materıaldyq-tehnıkalyq múmkindikter jaǵynan alǵanda, Qazaqstanda 238 ushaq, 300 tank, 1200 bronetehnıka, 124 saýda floty, 5 port jáne saýda termınaly, 96 áýejaı bar. Eldegi ushaqtardyń ishinde 80 joıǵysh, 75 tikushaq bar (olardyń 22-si — jaýyngerlik tikushaqtar).

Reıtıng derekteri boıynsha, elde 167 myń áskerı qyzmetshi bar, bul eldegi jalpy halyqtyń 0,9%-yn quraıdy. Elimizdiń syrtqy qaryzy 2021 jyly 167,5 mıllıard AQSh dollaryn qurady (140-tyń ishinde 38-oryn).

Bıylǵy jyldyń qańtar-aqpan aılarynda memlekettik basqarý, qorǵanys jáne mindetti áleýmettik qamtamasyz etý salasyndaǵy negizgi kapıtalǵa 1,8 mlrd teńge salyndy. Bul bir jyl burynǵyǵa qaraǵanda birden 66,7%-ǵa azaıǵan.