Elden qarjyny zańsyz shyǵaratyndarmen kúres kúsheıtiledi

ASTANA. QazAqparat - Ulttyq bank Qazaqstannan zańsyz qarjy shyǵarýmen kúres sharalaryn kúsheıtedi. Bul týraly Parlament Májilisiniń jalpy otyrysynda QR Ulttyq bank tóraǵasy Danııar Aqyshev málim etti, dep habarlaıdy QazAqparat. 

«Elden qarjy shyǵarýǵa qarsy baǵyttalǵan sharalar kúsheıtiledi. Atap aıtqanda, valıýtalyq baqylaý maqsatynda Ulttyq Bank pen Qarjy mınıstrliginiń arasyndaǵy ózara aqparattyq árekettestik sharalaryn keńeıtý josparlanǵan», - dedi Aqyshev.

Sonymen qatar ol Ulttyq banktiń aǵymdaǵy basymdyǵy Elbasynyń Qazaqstan halqyna Joldaýynda berilgen tapsyrmalaryn oryndaýǵa negizdeletinin atap ótti. Bul turǵyda basymdyqty sektorlardy nesıeleýmen qamtamasyz etýge ekpin qoıylmaq.

Budan buryn habarlanǵandaı, Ulttyq bank ınflıatsııany targetteý saıasatyn jalǵastyrady.

Sonymen qatar, Ulttyq bank basshysy teńgeniń aıyrbas baǵamyna qatysty táýekelder týraly aıtty.