Elden kapıtaldy shyǵarmaý boıynsha aýqymdy jumys júrgizilýde – Álibek Qýantyrov
Mınıstr óz sózinde qoldanystaǵy Salyq kodeksine sáıkes munaı sektory úshin ústeme paıdaǵa salynatyn salyq qoldanylatynyn atap ótti. Taza tabystyń shegerim somasynyń 25%-dan asatyn bóligine salyq salynady.
«Jer qoınaýyn paıdalanýshy ústeme paıdaǵa salynatyn salyqty mólshelermelerdiń jyljymaly mejeligi boıynsha tóleıdi. Ol shegerimderge taza kiristiń mólsherine baılanysty 7 deńgeıden turady. Árbir deńgeı úshin ústeme paıda salyǵyn esepteýdiń shekti somalary belgilenedi. Jalpy, is júzinde salyq tóleýshiler salyqty esepteý men tóleýdiń kúrdeliligine shaǵymdanbaıdy», - dedi ol.
Mınıstr atap ótkendeı, memleket álemdik ekonomıkalyq jaǵdaıdy eskere otyryp, ádil salyq salý saıasatyn júrgizýde. Tabıǵı resýrstarǵa baǵa joǵary bolǵan kezeńde bıýdjet óndirýshi sektordan úlken salyq qaıtarymyn alýda.
Qazaqstanda adal salyq júıesi jáne kásipkerlik qyzmetti, óńdeýshi ónerkásip pen aýyl sharýashylyqty yntalandyrýǵa baǵyttalǵan salyqtyq jeńildikter men preferentsııalardyń keń spektri qarastyrylǵan.
«Elimizdegi mıkro jáne shaǵyn bıznes kiris salyǵynan úsh jylǵa bosatylǵan jáne bul sýbektilerge qatysty tekserýler júrgizýge moratorıı jarııalanǵan. Sheteldik ınvestorlar úshin de qolaıly jaǵdaılar jasalǵan. Arnaıy ekonomıkalyq aımaqtarda salyq salýdyń jeńildetilgen rejımi qoldanylady», - dedi Á.Qýantyrov.
Sonymen qatar, elden kapıtaldy shyǵarmaýdy yntalandyrý boıynsha aýqymdy jumys júrgizilýde.
UEM basshysy MEEU (Munaı eksporttaýshy elder uıymy) Halyqaralyq damý qorynyń bas dırektorymen kelissózder júrgizdi.
Abdýlhamıd Alhalıf Qordyń qyzmeti týraly egjeı-tegjeıli aıtyp berdi. Onyń pikirinshe, Uıym QR turaqty damý jobalaryn qarjylandyrýda paıdaly bolýy múmkin.
Taraptar kómirtegi beıtaraptyǵyna qol jetkizý jónindegi josparlardy daıyndaý barysy týraly aqparat almasyp, yntymaqtastyqty odan ári keńeıtýge daıyndyǵyn bildirdi.
Foto: gov.kz