Elden 5 jylǵa shettetilgen sheteldik atyn ózgertip, Atyraýǵa qaıta kelgen
Oblystyq polıtsııa departamentiniń baspasóz qyzmetinen málim etkendeı, 6-12 jeltoqsan aralyǵynda «Mıgrant» jedel-profılaktıkalyq is-sharasy ótip jatyr.
«Іs-shara kezinde Qazaqstan Respýblıkasynyń aýmaǵynan qoǵamdyq orynda mas kúıde júrgeni úshin 5 jylǵa shettetilgen sheteldik azamat ustaldy. Tájikstan Respýblıkasynyń 35 jastaǵy azamatynyń óz eline baryp, jeke basyn rastaıtyn qujatyndaǵy aqparattardy ózgertip, Qazaqstanǵa keri kelgeni belgili boldy. Atalǵan derek taksı júrgizýshi bolyp júrgen Tájikstan Respýblıkasy azamatynyń qujatyn tekserý kezinde anyqtaldy», - deıdi Atyraý qalalyq polıtsııa basqarmasy kóshi-qon qyzmeti bóliminiń bastyǵy Qadyrbek Ábishov.
Onyń aıtýynsha, sheteldik óz kinásin tolyqtaı moıyndaǵan. Qazir el shekarasyna zańsyz kirgen Tájikstan azamaty 30 táýlikke ákimshilik qamaqqa alyndy. Al, jınaqtalǵan is-qujattar zańdy sheshim shyǵarý úshin sotqa joldandy.
Eske sala ketelik, buǵan deıin Atyraý oblysynda sheteldikterdi elge zańsyz kirgizgender tergelgenin habarlap edik.