Eldegi jerasty sýlarynyń 50 paıyzy ońtústikte shoǵyrlanǵan - ekologııa mınıstrligi
Ortalyq kommýnıkatsııalar qyzmetinde ótken brıfıngide QR Ekologııa, geologııa jáne tabıǵı resýrstar vıtse-mınıstri Serikqalı Brekeshev osylaı dep málim etti.
«Qatty paıdaly qazbalardyń qoryn esepteý metall paıdaly qazbalardyń 37 túri jáne beımetalldyń 65 túri boıynsha júrgiziledi. Altyn ken oryndarynyń negizgi qorlary Shyǵys Qazaqstan oblysynda – 36%, Aqmola oblysynda – 21%, Qaraǵandy oblysynda – 11% shoǵyrlanǵan. Mystyń 82% qory elimizdiń Shyǵys jáne Ortalyq óńirlerinde shoǵyrlanǵan. Úsh myńnan astam qorǵasyn-myrysh ken oryndary jáne ken ashylymdary, negizinen, Ortalyq, Shyǵys jáne Ońtústik Qazaqstanda shoǵyrlanǵan», - dedi vedomstvo ókili.
Onyń aıtýynsha, el aýmaǵynda táýligine 43 mln tekshe metr sý beretin 4 myńǵa jýyq jerasty kenishi bar.
«Jerasty sýynyń qory da ár óńirde árqalaı. Barsha qordyń 50%-y ońtústikte, 30%-y ortalyq, soltústik jáne shyǵys óńirlerde jáne 20%-ǵa jetpeıtin qory bastysta shoǵyrlanǵan», - dedi Serikqalı Brekeshev.
Sondaı-aq, ol eldiń batysyndaǵy aýyz sý tapshylyǵyn Kókjıdeniń kómegimen retteýge bolady degen paıym aıtty.
«Kókjıde ken orny eldiń batysyndaǵy eń iri sý qory bolyp esepteledi. Onyń áleýetin turǵyndardyń sapaly aýyz sýǵa tapshylyǵyn joıýǵa paıdalanýǵa bolady. Qazir Aqtóbe oblysy ákimdiginiń tapsyrysy boıynsha «Aqpan» JShS Kókjıde ken ornynyń qazirgi jaǵdaıyn zertteý maqsatynda jerasty sýlarynyń paıdalanylatyn qorlaryn jete barlaý jáne qaıta baǵalaý boıynsha jumystar júrgizip jatyr. 2021 jyldyń aıaǵyna qaraı jerasty sýlarynyń qorlary qaıta baǵalanady. Ken ornynyń ózekti kontýrlary aıqyndalady jáne naqty ekologııalyq júktemesi baǵalanady», - dedi Serikqalı Brekeshev.