Eldegi kolledjderde demonstratsııalyq emtıhan úlgisi engizilip jatyr

NUR-SULTAN. QazAqparat - Kúlli álemge tanymal WorldSkills qozǵalysy Qazaqstanda belsendi damyp keledi. Óńirlik jáne respýblıkalyq chempıonattardy uıymdastyrý men ótkizý júıesi jetildirilip, áriptestik ınstıtýttary men sarapshylar qoǵamdastyǵy da damytylyp jatyr. Bul týraly WorldSkills Kazakhstan Bas Assambleıasynyń kezekti otyrysynda aıtyldy, dep habarlaıdy QR BǴM baspasóz qyzmeti.

Qazaqstan WorldSkills baǵdarlamasyna 2014 jyly qatysyp, WSI-niń 70-shi múshesi atandy. Az ýaqyttyń ishinde qazaqstandyq stýdentter álemdik chempıonattarda jaqsy nátıjeler kórsetti.

«WorldSkills qozǵalysyna biz jetinshi jyl qatarynan qatysyp kelemiz. Osy ýaqyt ishinde Qazaqstan 50-orynnan 14-orynǵa deıin kóterildi. 2019 jyly bizdiń stýdentter jalpykomandalyq esepte 63 qatysýshy eldiń arasynda 14-shi orynǵa ıe bolǵanyn esterińizge sala keteıin. Bul - jaqsy nátıje. Qazaqstan jumysshy mamandardy daıarlaý salasyndaǵy úzdik praktıkalardyń benchmarkıngi úshin bul qozǵalysty odan ári damytatyn bolady. Atap aıtqanda, biz WorldSkills standarttaryn oqý protsesine engizip, kolledjderde demonstratsııalyq emtıhandardy ótkizemiz. Sondaı-aq sarapshylardy oqytý jáne sertıfıkattaý boıynsha jumysty uıymdastyramyz», – dedi Bilim jáne ǵylym vıtse-mınıstri Sholpan Karınova.

2020 jyly WorldSkills standarttary boıynsha demonstratsııalyq emtıhan ótkizý boıynsha usynystar ázirlenip, elimizdiń 36 kolledjine emtıhannyń demo-nusqasyn engizý bastaldy. Sonymen birge ótken jyly WorldSkills Qamqorshylyq keńesi quryldy. AgroSkills, «Kazakhmys» korporatıvtik chempıonaty jáne basqa da salalyq baǵyttar bıznestiń qatysýymen jetildirip keledi.

WorldSkills – bul jumysshy mamandyqtary boıynsha kadrlardy daıarlaý sapasyn arttyrýǵa jáne olardy jastar arasynda tanymal etýge baǵyttalǵan halyqaralyq qozǵalys.