Eldegi ken qorynyń ortaıǵanyn Qashaǵan ǵana bildirmeı tur – Serikqalı Brekeshev

NUR-SULTAN. QazAqparat - QR Ekologııa, geologııa jáne tabıǵı resýrstar vıtse-mınıstri Serikqalı Brekeshev ıgerilgen kenniń ornyn jańasymen tolyqtyrý problemasy týraly pikir bildirdi, dep habarlaıdy QazAqparat tilshisi.

«Qala quraýshy kásiporyndardy ken qorymen qamtamasyz etý problemasy qazir ózekti, birneshe ret talqyladyq ta. Basty problema paıdaly qazbalar qorynyń baıaý tolyǵyp jatýynda. Geologtar arasynda jazylmaǵan ereje bar. 1 tonna óndirseń, ornyn eki tonna qormen toltyrý kerek. Búginde qatty paıdaly qazbalardy óndirý kólemi men tolyǵýdyń arasyndaǵy ósý koeffıtsıenti ortasha eseppen 0,13, munaı qorynyń tolyǵý koefıtsenti – 1,5». - dedi Serikqalı Brekeshev OKQ brıfınginde.

Vedomstvo ókiliniń aıtýynsha, eldegi ken qory ortaıyp bara jatqanyn Qashaǵandaǵy munaıdyń qory bildirmeı tur.

«Bir qaraǵanda ósim jaman emes sııaqty. Biraq buǵan negizinen Qashaǵan ken orny esebinen solaı bolyp otyr. Qashaǵan bolmasa, ken qorynyń tolyǵý koeffıtsıenti 0,9 belgisinde bolar edi. Bul problemany sheshý úshin jańa perspektıvaly ýchaskelerdi jedel anyqtap, eski ken oryndaryn jete barlaý qajet. Geologııalyq barlaýǵa jeke ınvestorlardy tartý kerek. Óıtkeni jańa ken ornyn ashqannan keıin ony iske qosý úshin keminde 10-15 jyl kerek», - dep qorytyndylady vıtse-mınıstr.