Eldegi gıdrotehnıkalyq qurylystardyń jartysyna jýyǵy apatty jaǵdaıda tur

NUR-SULTAN. QazAqparat - Senator Sergeı Ershov kóktemgi sý tasqyny jaǵdaıyna qatysty máselelerdi Premer-Mınıstr Álıhan Smaılovtyń atyna joldaǵan depýtattyq saýalynda kóterdi, dep habarlaıdy QazAqparat tilshisi.

Depýtat Qazaqstanda ár kóktem saıyn sý tasqyny bolatynyn aıtty.

«Olardyń basym kópshiligi ótken ǵasyrdyń 60-70 jyldary salynǵan jáne qazirgi ýaqytta fızıkalyq jáne moraldyq jaǵynan 40%-ǵa deıin tozǵan bógetter men bógetterdegi gıdrotehnıkalyq qurylystardyń jaı-kúıi, al keıbir jaǵdaılarda olardyń tolyq bolmaýy erekshe alańdaýshylyq týǵyzady. Qazaqstandaǵy gıdrotehnıkalyq qurylystardyń jartysyna jýyǵy apatty jaǵdaıda jáne jóndeýdi ne jańǵyrtýdy qajet etedi», - dedi S. Ershov Senattyń jalpy otyrysynda.

Senator aǵymdaǵy jyldyń aqpan aıynda Prezıdent Úkimetke jańa Sý kodeksiniń jobasyn ázirleýdi tapsyrǵanyn eske saldy, óıtkeni 2003 jyly qabyldanǵan kodeks sý resýrstaryn saqtaýǵa jáne olardy tıimdi paıdalanýǵa múmkindik bermeıdi.

«Bul másele birneshe jyldar boıy Senatta parlamenttik tyńdaýda, Úkimet saǵatynda talqylanǵanyn atap ótken jón, onda ǵalymdar men sarapshylardyń qatysýymen qadamdyq is-qımyldarmen keshendi usynymdar ázirlendi. Úkimet, ortalyq jáne jergilikti atqarýshy organdardyń basshylary elimizdiń sý qaýipsizdigin qamtamasyz etý úshin júıeli sharalar qabyldap jatyrmyz dep áldeneshe ret esep bergen bolatyn. Alaıda aǵymdaǵy sý tasqyny jaǵdaıy, atap aıtqanda, Batys Qazaqstan, Aqtóbe, Aqmola, Soltústik Qazaqstan jáne Qaraǵandy oblystaryndaǵy jaǵdaı kerisinshe bolyp otyr», - dedi senator Ershov.

Osyǵan baılanysty, depýtat Úkimetten sý tasqyny jaǵdaılarynyń aldyn alýǵa jáne joıýǵa baǵyttalǵan uıymdastyrýshylyq, zańnamalyq jáne keshendi sıpattaǵy qajetti júıeli sharalardy qabyldaýdy jáne Palatanyń taıaýda ótetin otyrysynda jaýap berýdi surady.

Aıta keteıik, bıyl aqpan aıynda jańa Sý kodeksine qatysty jumys bastaldy.