Eldegi depozıtterdiń jalpy kólemi 30 trln teńgege deıin jetti

ASTANA. QazAqparat – Qarjy naryǵyndaǵy oınyshylardyń teńgedegi aktıvterge degen senimi artty. Úkimettiń keńeıtilgen otyrysynda QR Ulttyq bankiniń basqarma tóraǵasy Ǵalymjan Pirmatov osyndaı málimet keltirdi, dep habarlaıdy QazAqparat tilshisi.

«2022 jylǵy kútpegen ózgeristerdiń buryn-sońdy bolmaǵan sıpatyna qaramastan Ulttyq bank kelesi nátıjelerge qol jetkizdi.

Birinshi – qarjy júıesiniń turaqsyzdanýynyń aldyn alý. Qabyldaǵan ulttyq jedel sharalar qarjy júıesiniń turaqtylyǵyn saqtaýǵa múmkindik berdi. Ekinshi – bıyl qazan aıynda depozıtter eń joǵary tarıhı deńgeıge, ıaǵnı, 30 trln teńgege deıin jetip, teńgedegi aktıvterge degen senim artty.

Úshinshi - valıýta naryǵynyń teńgerimdiligi qamtamasyz etildi. Naryqtaǵy suranys pen usynysty naryq qatysýshylary aıqyndaıdy», - dedi Ǵalymjan Pirmatov.

Sondaı-aq, ol damýshy naryqtardan kapıtaldyń aıtarlyqtaı áketilýine qaramastan, Ulttyq banktiń basqarýyndaǵy aktıvterdiń uzaq merzimdi kiristiligi oń aımaqta saqtalyp turǵanyn atap ótti.

«Besinshi – halyqtyń bólshek tólemderine qyzmet kórsetýi úshin ulttyq tóleý júıesi iske qosylyp, naqty qatysýshylarmen tsıfrlyq teńgeniń tehnologııalyq paltformasy testileýden sátti ótti», - dedi Ulttyq bank basshysy.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.

Jıyn barysynda elimizdiń bıylǵy áleýmettik-ekonomıkalyq damýynyń negizgi kórsetkishteri týraly esep beriledi jáne Úkimettiń 2023 jylǵa arnalǵan jumys jospary qarastyrylady dep josparlanyp otyr.

Foto: t.me/bort_01