Eldegi barlyq etnomádenı birlestikter arystyqtarǵa qol ushyn sozýda

NUR-SULTAN. QazAqparat - Qazaqstan halqy Assambleıasy Tóraǵasynyń orynbasary Janseıit Túımebaev Arystaǵy jarylystan qaza bolǵan 3 adamnyń otbasyna Assambleıa atynan kóńil aıtty, dep habarlaıdy QazAqparat tilshisi.

«Elimizde bolǵan qaıǵyly jaıdaıǵa baılanysty Túrkistan oblysynyń jurtyna, onyń ishinde Arys qalasynyń turǵyndaryna, tótenshe jaǵdaıdan kóz jumǵan 3 adamnyń otbasyna Qazaqstan halqy Assambelıasynyń atynan kóńil aıtamyn. Oqıǵa bolǵan 24 maýsymnyń tús kezinde-aq QHA shuǵyl shtab quryp, kómek uıymdastyra bastady», - dedi Janseıit Túımebaev búgin Nur-Sultan qalalyq QHA sessııasynda.

Ol sondaı-aq eldegi barlyq etnomádenı qurylymdardan búginge deıin tek qarjylaı kómek retinde 50 mln teńge aýdarylǵanyn atap ótti.

«Kómektiń kóbin aqshalaı jınap jatyrmyz. Eldegi barlyq óńirlerden Assambleıa birlestikteri jınaǵan kómek kerýenderi daıyndalýda. Mysaly, Oraldan - 30 tonna, Qaraǵandydan - 20 tonna, Nur-Sultan qalasynan 22 tonna zattaı kómek jiberildi. 24 maýsym kúni Túrkistan oblysyndaǵy túrik, ázerbaıjan, káris, ózbek etnomádenı birlestikteri apat aýyrtpalyǵyn jeńildetýge barynsha kúsh saldy. Solardyń kúshimen 600 adamǵa ýaqytsha baspana daıyndaldy. Ózbek etnomádenı birlestigi apat kúni - 1000 adamǵa, ázerbaıjan ortalyǵy 500 adamǵa tamaq uıymdastyrdy», - dedi ol.

Aıta keteıik, búgingi sessııa barysynda elordalyqtar Arysta búlingen 500 úıdi jóndep beretini aıtyldy.