Eldegi ahýaldy retteý úshin halyqaralyq bedelin paıdalanyp jatqan Qazaqstan Prezıdentine rızamyn - P.Poroshenko

ASTANA. QazAqparat - Memleket basshysynyń Ýkraınaǵa saparyn qorytyndylaǵan brıfıng barysynda Petr Poroshenko halyqaralyq bedelin eldegi ahýaldy retteýge paıdalanyp jatqan Qazaqstan Prezıdentine rızashylyǵyn bildirdi.

Bul týraly Aqordanyń resmı saıtynda habarlandy.

Brıfıng barysynda Qazaqstan Prezıdenti Ýkraına bizdiń elimizdiń ekonomıkamen qatar saıasattaǵy jaqyn seriktesi bolyp sanalatynyn aıtty. Kelissózder barysynda Ýkraınaǵa Ekibastuz kómirin jetkizý týraly ýaǵdalastyq jasalǵanyna toqtaldy.

Sonymen qatar, Nursultan Nazarbaev P.Poroshenkony Qazaqstanǵa saparlap kelýge shaqyrdy. Onyń aıasynda bıznes forým da uıymdastyrylmaq.

Ýkraına tóńiregindegi ahýalǵa qatysty Qazaqstan Prezıdenti oqıǵanyń bulaı órbıtinin boljaý qıyn bolǵanyn aıtty.

- Bizge ekonomıkany kóterý ornyna basqa máselelermen aınalysýǵa týra keldi. Qazaqstan táýelsizdik jyldarynda ǵajap tabystarǵa qol jetkizdi. Munyń bári kóp ultty eldegi tatýlyq pen tynyshtyqtyń arqasynda múmkin boldy, Ýkraınaǵa da sony tileımin. Tatýlyq pen turaqtylyq jaǵdaıynda ǵana halyqqa jaqsy jaǵdaı jasaýǵa bolady, - dedi Nursultan Nazarbaev.

Memleket basshysy qalyptasqan ahýaldan shyǵýdyń joldary bar ekenine toqtaldy.

- Negizgi seriktes bolyp sanalatyn Reseımen qarym-qatynasty qalpyna keltirýge bolady dep oılaımyn. Ýkraına Eýropaǵa jaqyn, osyny eskere otyryp, onymen qaýymdasýyn tolyq túsinýge bolady. Men úlken ári tájirıbeli adam retinde Reseıdi de, Ýkraınany da eldiń aýmaqtyq tutastyǵyn saqtaı otyryp, tyǵyryqtan shyǵýdyń jolyn izdeý úshin birlesip jumys isteýge shaqyramyn. Ýkraına bul jaǵdaıdan nyǵaıyp shyǵady jáne árdaıym solaı bolǵany sekildi qýatty elge aınalady dep úmittenemin. Onyń zor ekonomıkalyq áleýeti bar, - dedi Qazaqstan Prezıdenti.

Nursultan Nazarbaev barlyq tarap Mınsk ýaǵdalastyqtaryn ustanatynyn atap ótti.

- Onda jazylǵan máselelerdi sheshýge bolady. Bul rette bári ulttyq azshylyq quqyǵyna tireledi. 100-den astam ult turatyn Qazaqstanda túrli etnostardyń ana tilinde oqytatyn mektepter, ulttyq teatrlar bar. Qazaqstan halqy Assambleıasy jáne onyń qasynda til úırenýge, mádenıet pen tarıhty saqtaýǵa septigin tıgizetin 36 mádenı ortalyq jumys isteıdi. Bul álemdik tájirıbe, Ýkraına muny óz memlekettiligi aıasynda qoldanýyna bolady. Jaǵdaıdan shyǵýdyń joly bar ekenine senimdimin jáne ony tezirek paıdalaný qajet, - dedi Memleket basshysy.

P.Poroshenko aıaqtalǵan kelissózderdiń syndarly ári jemisti bolǵanyna nazar aýdardy.

- Sizdiń saparyńyz bizdiń ekonomıkadaǵy yntymaqtastyǵymyzdyń negizgi baǵyttaryna jańa serpin beretinine senimdimin. Ýkraınanyń shyǵysyndaǵy ahýaldy ýshyqtyrmaý jónindegi ózara yqpaldastyq pen ustanymdardy úılestirý máseleleri jeke qaraldy. Qazaqstan halyqaralyq quqyq normalaryn sózsiz saqtaý ustanymynda. Óziniń halyqaralyq bedelin ahýaldy retteýge paıdalanyp jatqan Qazaqstan Prezıdentine rızamyn, - dedi Ýkraına Prezıdenti.