Eldegi 710 mekteptiń tozyǵy jetken - mınıstrlik

ASTANA. QazAqparat – Qazaqstanda tozyǵy jetken 710, paıdalaný merzimi 70 jyldan asatyn 177 mektep bar. Mundaı derekterdi «Jaıly mektep» ulttyq jobasynyń qaǵıdalary men talaptaryn bekitý úshin ashyq talqyǵa shyǵarylǵan qujatta Oqý-aǵartý mınıstrligi keltirdi, dep habarlaıdy QazAqparat tilshisi.

«Qazirgi qoldanystaǵy 710 mekteptiń tozyǵy jetken. Paıdalaný merzimi 70 jyldan asatyn ǵımaratty qoldanyp otyrǵan 177 mektep bar. Olardyń ishinde 353 mektep samannan, 69 mektep aǵashtan, 5 mektep qamystan salynǵan. 147 mektepte úsh aýysymdyq oqytý júrgizilip, 33 mektep apatty dep tanyldy. Sonymen qatar, «Jaıly mektep» ulttyq jobasyn ázirleý barysynda úsh aýsymmen oqıtyn birneshe júz mektep anyqtaldy.

Mektepter qurylysynyń bıylǵy jyldamdyǵy demografııalyq, úrdistiń, kóshi-qonnyń, oqýshy ornynyń tapshylyǵynyń qarqynymen teń kele almaı otyr. 2020 jyldan 2022 jyldyń birinshi jartyjyldyǵyna deıin 1 039 775 bala ómirge keldi. Sońǵy úsh jylda birinshi synyp oqýshylarynyń sany 1 160 311 oqýshyny qurady. Halyqtyń kóshi-qon kólemi 34 paıyzǵa artty. Al mektep ǵımarattarynyń tozýy 15 paıyzdy qurap otyr. Boljam boıynsha 2026 jylǵa qaraı oqýshy ornynyń tapshylyǵy 1,1 mln-ǵa jetýi múmkin», - dep kórsetilgen qujatta.

Atalǵan máselelerdiń sheshimi retinde Prezıdent «Jaıly mektep» ulttyq jobasyn qolǵa alýdy tapsyrdy. Joba nátıjesinde 2026 jylǵa deıin 800 myń balaǵa arnalǵan eki aýsymdyq mektepter salynady.