Eldegi 70 JOO merzimdi áskerdegilerge tegin joǵary bilim berýge daıyn – Qorǵanys mınıstrligi

ASTANA. QazAqparat – Áskerı komandırdiń oń qorytyndysyn alǵan merzimdi áskerdegi jaýyngerlerge tegin joǵary áskerı bilim usynylýy múmkin. Qorǵanys mınıstrliginiń bul bastamasyn eldegi 70 joǵary oqý orny qoldap otyr, dep habarlaıdy QazAqparat tilshisi.

Bul týraly Bas shtab bastyǵy - QR Qarýly Kúshteri Qurlyq áskerleri bas qolbasshysynyń birinshi orynbasary Qanysh Ábýbákirov ortalyq kommýnıkatsııalar qyzmetinde ótken brıfıngide málim etti.

«Bul bastamany Qorǵanys mınıstrligi byltyr qolǵa alǵan. Bir jylda eldegi jetekshi joǵary oqý oryndary men mınıstrlik arasynda memorandýmdar jasaldy. Sol memorandým aıasynda birneshe sharany iske asyramyz. Birinshi kezekte Otan aldyndaǵy boryshyn eki jyl ótegen jastar Qazaqstannyń joǵary oqý oryndaryna UBT tapsyrmaı-aq aqyly oqýǵa túse alady», - dedi ol.

Qanysh Ábýbákirovtiń sózinshe, ásker qatarynda jaqsy jaǵynan kóringen jastarǵa tegin áskerı bilim alý múmkindigi de berilmek.

«Ekinshiden merzimdi áskerı qyzmette júrip jaqsy jaýyngerlik daıyndyq kórsetken, jyl boıynda tártibi úzdik bolǵan sarbazdar aqysyz negizde joǵary áskerı bilim alýǵa múmkindik alady.

Shamamen 3 myń adamǵa osyndaı múmkindik usynýdy josparlap otyrmyz. Qazir bul bastamamyzdy 70-ten astam joǵary oqý orny qoldady», - dedi Bas shtab bastyǵy.