Eldegi 3 oqý orny zertteý ýnıversıtetine aınalady

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov Úkimet otyrysynda joǵary bilim bersý salasynda zertteý ekojúıesin qalyptastyrý úshin qandaı sharalar qabyldanyp jatqanyn atady, dep habarlaıdy QazAqparat tilshisi.

«Sapany kóterýdiń taǵy bir tetigi – básekelestikti arttyrý. Otandyq ýnıversıtetterdiń sheteldik úzdik ýnıversıtettermen tájirıbe almasý jáne básekege qabiletti bolýy úshin biz Qazaqstanda sheteldiń aldyńǵy qatarly ýnıversıtetteriniń fılıaldaryn ashý boıynsha jumysty bastap kettik. Bıyl De Montfort Leicester ýnıversıtetiniń fılıaly ashyldy. University of Arizona jáne Arizona State University fılıaldaryn ashý jumystary júrgizilýde», - dedi vedomstvo basshysy.

Onyń aıtýynsha, bul baǵytta taǵy kem degende 5 fılıal ashý josparlanǵan.

«Joǵary oqý oryndarynyń básekege qabilettiligin arttyrý úshin óńirlerdegi 20 joǵary oqý ornynyń bazasynda akademııalyq artyqshylyq ortalyqtary qurylady. Joba sheńberinde bul ýnıversıtetterdiń materıaldyq-tehnıkalyq bazasy, ǵylymı zerthanalary nyǵaıtylady jáne bilim baǵdarlamalary jańartylady. Zertteý ekojúıesin qalyptastyrý úshin úsh joǵary oqý ornyn zertteý ýnıversıtetterine aınaldyrý jospary bar», - dedi Ashat Aımaǵambetov.

Sonymen qatar, ol Nazarbaev Ýnıversıtetiniń tájirıbesi negizinde 2 ozyq oqý ornyn qurý jumystary qarqyndy júrip jatqanyn atady.

«Bolashaqta joǵary oqý oryndarynyń arasyndaǵy básekeni yntalandyrý úshin ýnıversıtetter tórt lıga boıynsha bólinedi. Sáıkesinshe, joǵary oqý oryndaryna akademııalyq, basqarý erkindiginiń deńgeıleri ózi kiretin lıganyń deńgeıine saı beriledi. Sondaı-aq eń myqty ýnıversıtetter memlekettik baqylaýdan bosatylyp, kerisinshe 3 lıgaǵa jáne 4 lıgaǵa enbegen ýnıversıtetter memlekettiń baqylaýynda, tekseris ústinde bolady», - dedi mınıstr.