Eldegi týrızm nysandarynyń álemdik standarttarǵa sáıkestigi tekseriledi

<p>Premer-Mınıstr Álıhan Smaıylov Úkimet otyrysynda eldegi týrızm nysandarynyń álemdik standarttarǵa sáıkestigin tekserýdi tapsyrdy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.&nbsp;</p>

«Elimizdiń búkil týrıstik áleýetin paıdalaný ózekti kúıinde qalyp otyr. Máselen Baıanaýyl kýrort aımaǵynda týrızmdi damytý tek Jasybaı kólimen shektelgen. Óńirdegi basqa da kólderdiń, taýlar men mádenı eskertkishterdiń múmkindikteri nazardan tys qalǵan. Ótken jazǵy maýsymda Assy ústirti men Qapshaǵaı aımaǵyna týr uıymdastyrý kezinde qyzmetterdiń sapasyna kóptegen shaǵym tústi. Taksı, tamaqtaný jáne qonaq úı qyzmetteri baǵalarynyń sharyqtap ketýine qatysty shaǵymdar jıi aıtylady. Mundaı orynsyz jaǵdaılar eldiń týrıstik tartymdylyǵyn tómendetedi», - dedi Úkimet basshysy.

Álıhan Smaıylovtyń paıymynsha, qonaqúılerdi sanat boıynsha jikteý júıesin reformalaý jáne standarttardy halyqaralyq deńgeıge deıin kóterý jumystaryn bastaý qajet.

«Týrızm jáne sport mınıstrligi Saýda jáne ıntegratsııa mınıstrligimen birlesip, týrızm salasyndaǵy obektiler men kórsetiletin qyzmetterge álemdik standarttarǵa sáıkestigi turǵysynan tekserý júrgizsin», - dedi Premer-Mınıstr.