Eldegi qaı joldar syrtqy qaryz esebinen salynyp jatyr

<p>ASTANA. KAZINFORM &ndash; Qarjy mınıstrligi Kazinform saýalyna joldaǵan jaýabynda syrtqy qaryzdyń esebinen iske asyrylyp jatqan jobalardy atady.</p>

«Úkimet qaryzdary birinshi kezekte jumys oryndaryn ulǵaıtýǵa jaǵdaı jasaıtyn, bıýdjetke qosymsha túsimder ákeletin jáne materıaldyq aktıvterdi qurýǵa baǵyttalǵan, áleýmettik mańyzy bar jobalarǵa tartylýda. Búgingi tańda memlekettik syrtqy qaryzdardyń qoldanystaǵy portfeli birqatar iri ınfraqurylymdyq, sondaı-aq ekonomıkanyń ártúrli salalaryndaǵy áleýmettik mańyzy bar jobalardy qamtıdy», - dep jazylǵan mınıstrlik málimetinde.

Naqtyraq aıtsaq, syrtqy qaryzdar 4 baǵyttaǵy jobalarǵa jumsalyp otyr.

Avtojol salasynda:

- Almaty jáne Qaraǵandy oblystarynda – «Qurty-Býrylbaıtal», «Uzynaǵash-Otar», «Balqash-Býrylbaıtal»;

- Aqtóbe jáne Atyraý oblystarynda – «Aqtóbe-Maqat»;

Qyzylorda jáne Túrkistan oblystarynda – «Qyzylorda oblysynyń shekarasy - Shymkent» jol ýchaskelerin rekonstrýktsııalaý;

Sýmen jabdyqtaý sektorynda:

- Almaty, Jambyl, Túrkistan jáne Qyzylorda oblystarynda «Irrıgatsııalyq jáne drenajdyq júıelerdi jetildirý» jobasynyń ekinshi kezeńi».

Bilim berý jáne ǵylymı zertteýler salasynda:

- «Ónimdi ınnovatsııalardy yntalandyrý»,

- «Orta bilim berýdi jańǵyrtý» jobalary;

Memlekettik sektordy jetildirý sheńberinde:

- keden pýnktterin jańǵyrtý jónindegi jobasy.

Mınıstrliktegiler atalǵan qaryzdardyń paıyzdyq mólsherlemesi men negizgi somanyń syrtyndaǵy artyq tólemniń mólsherin ashyp aıtýdan bas tartyp otyr.

«Úkimettik syrtqy qaryzdardy tartý mólsherlemeleri boıynsha derekterdi ashý kredıtorlar úshin sezimtal aqparat bolyp tabylatynyn jáne keıingi qaryz alý sharttaryna teris áser etýi múmkin ekenin atap ótemiz», - delingen jaýapta.

Buǵan deıin Qazaqstan Úkimeti qaı elge qansha qaryz ekenin jazǵan bolatynbyz.

Jyl basynan beri Úkimet ishki naryqqa memlekettik baǵaly qaǵaz shyǵarý arqyly 4 trln 996,6 mlrd teńge qaryz tartqan.