Eldegi energııanyń 20 %-yn berip otyr: murjasynan aqaý shyqqan Ekibastuz elektr stansasy týraly ne bilemiz

<p>PAVLODAR. KAZINFORM &mdash; &laquo;Bolat Nurjanov atyndaǵy Ekibastuz 1-MAES&raquo; JShS Ekibastuz qalasynan 16 shaqyrym jerde ornalasqan. Jobalyq belgilengen elektr qýaty &mdash; 4000 MVt. Munda 8 energııa blogy bar, árqaısysy 500 MVt qýatqa ıe. Stansa Ekibastuzdyń kúli joǵary tas kómiri men mazýtty paıdalanady.</p>

Kásiporynda biri — 300, ekinshisi 330 metrlik qos alyp murja ornalasqan. Onyń árqaısysy 4 energııa blogyna qyzmet etedi. Apattyq jaǵdaı sonyń alǵashqy murjasynda paıda bolǵan.

Atap óterligi, MAES-1 úlken kólemdegi kommýnaldyq jylý óndirmeıdi. Sebebi ol eldi mekenderden alshaq ornalasqan. Keńes zamanynda Ekibastuz qalasyna jylý qubyryn tartý týraly jospar bolǵan. Alaıda joba qymbatqa túsedi dep eseptep, júzege asyrýdan bas tartqan.
Munda qazirgi ýaqytta 1507 adam eńbek etedi. Ortasha eńbekaqy kólemi 488 myń teńgeni quraıdy.

KEGOC kompanııasynyń derekterine súıensek, Qazaqstan boıynsha Birtutas elektr energetıkalyq júıe (BEJ) negizgi úsh aımaqtan turady. Elektr stansalardyń, elektr jetkizý jelileri men qosalqy stansalardyń jıyntyǵynan turatyn bul júıede Pavlodar oblysyndaǵy aımaqtyq elektr stansalary aıryqsha mánge ıe ekenin atap ótken jón. Júıeniń «Soltústik aımaǵyna» Shyǵys Qazaqstan, Abaı, Pavlodar, Aqmola, Qostanaı, Soltústik Qazaqstan, Aqtóbe, Qaraǵandy jáne Ulytaý oblystary enedi. Al «Ońtústik aımaqqa» — Almaty, Jetisý, Jambyl, Túrkistan jáne Qyzylorda oblystary, «Batys aımaqqa» Batys Qazaqstan, Atyraý jáne Mańǵystaý oblystary baılaýly.

Buǵan qarap elimizdegi ónerkásipti aımaqtar men aýyr óndirisi damyǵan óńirler negizinen Ekibastuzdaǵy elektr stansalarynyń qýatyna táýeldi ekenin baıqaýǵa bolar. Onyń ústine otandyq elektr qýatynyń 40 paıyzdan astamy Ertis-Baıan jerinde óndiriletinin eskergen abzal. Eldegi ulttyq mańyzy bar 8 elektr stansasynyń úsheýi Pavlodar oblysynda ornalasqan (Ekibastuz MAES-1, Ekibastuz MAES-2 jáne «EEK» AQ elektr stansasy). Olardyń belgilengen jıyntyq qýaty — 7035 MVt.

QR Energetıka mınıstrliginiń aqparynsha Qazaqstanda 2023 jyly 112,8 mlrd kılovat elektr qýaty óndirilip, tutynýshylarǵa tasymaldanǵan. Al Ekibastuz MAES-1 stansasy byltyr 22,8 mlrd kılovatt elektr qýatyn óndirgen. Bul — elimizdegi jalpy qýattyń 20,21 paıyzy. ıAǵnı elimizdegi energııa óndirisiniń besten biri atalǵan kásiporynǵa tıesili. Sondaı-aq Ekibastuz MAES-2 stansasy ótken jyly — 5,6 mlrd, «EEK» AQ 16 mlrd kılovatt qýat óndirgen.

Eske sala keteıik, 2022 jyldyń 27 qarashasynda Ekibastuz JEO-synda apat bolyp, qala turǵyndary qatty aıazda jylýsyz qalǵan edi.

Búgin jazǵanymyzdaı, Ekibastuz № 1 MAES stansasynda bir energııa blogy kenetten jumysyn toqtatty.

Ekibastuz elektr stansasyndaǵy apatqa baılanysty mınıstrlik túsinikteme berdi.