Elde óndiriletin jańartylatyn energııanyń úlesi tómen — senator
«Qazir elimizdegi elektr energııasynyń 70 paıyzy kómir otynyn jaǵý ádisinen óndiriledi. Bul rette, elektr stantsııalarynyń ortasha tozý deńgeıi 56 paıyzdy qurady. Elektr stantsııalarynyń basym bóligi jobalyq qyzmet merziminen asyp ketken ári eskirgen tehnologııalarmen jumys isteıdi. Kómir elektr stantsııalaryn paıdalanýdyń ortasha merzimi 55 jyldy qurap otyr, al olardyń jabdyqtarynyń normatıvtik resýrsy shamamen 30 jylǵa jetti. Ózderińiz biletindeı, Qazaqstan 2016 jyly qol qoıylǵan Parıj kelisimi boıynsha mindettemeler alǵan. Onyń aıasynda 2030 jylǵa qaraı parnıktik gazdardardy 1990 jylǵy deńgeıden 15%-ǵa qysqartý kózdelip otyr. Bul óz kezeginde jańartylatyn energııa kózderi arqyly energııa óndirý deńgeıin arttyrýdy talap etedi», — dedi S. Aldashev.
Onyń aıtýynsha, Qazaqstannyń «jasyl ekonomıkaǵa» kóshýi jónindegi tujyrymdamasymen nysanaly ındıkatorlar — elektr energııasyn óndirýdiń jalpy kólemindegi balamaly kózderdiń úlesine 2030 jylǵa qaraı 30 paıyzǵa deıin jáne 2050 jylǵa qaraı 50 paıyzǵa deıin jetkizý bekitildi.
«Aıta ketý kerek, elde óndiriletin jańartylatyn energııanyń úlesi tómen jáne osyǵan baılanysty strategııalyq qujattarda alǵa qoıylǵan órshil maqsattarǵa qol jetkizý qıynǵa soǵady. ESG qaǵıdattarynyń mańyzdylyǵyn eskere otyryp, ESG-standarttar salasyndaǵy syn-qaterlerdiń jaǵdaıyn retteıtin zańnamaǵa taldaý júrgizýdiń jáne olarǵa tıisti ózgerister engizýdiń ózektiligine nazar aýdarý qajet. Eń aldymen, jańartylatyn energııa kózderin paıdalanýdy zańnamalyq retteýge, onyń engizilýin yntalandyrý tetikterin, kedergilerdi alyp tastaýdy, jańartylatyn energııa kózderiniń zamanaýı tehnologııalaryn transfertteýdi jáne basqa da baǵyttarǵa qatysty», — dedi depýtat.
Budan buryn habarlanǵandaı, Senat tóraǵasy Máýlen Áshimbaev qazir álemde ESG qaǵıdalaryn engizý turaqty bıznes qalyptastyrýǵa, ony básekege qabilettigin arttyrýǵa jáne uzaq merzimdi qundylyqtardy dáripteýge yqpal etetinin aıtty.