Elde ashylatyn shaǵyn sportzaldar jastardy úlken arenalarǵa jeteleıdi - Dıdar Hamza
Sportshynyń sózinshe, Elbasynyń sarabdal saıasatynyń arqasynda sportqa bet buratyn jastardyń sany artady. Elde shaǵyn sport zaldar kóptep ashylsa, úlken arenalarǵa dańǵyl jol salynady.
«Elbasy Jastar jylyn jarııalady. Endi jastar saıasatyn jan-jaqty qoldaý men júzege asyrýǵa baǵyttalǵan aýqymdy is-sharalar qolǵa alyna bastaıdy degen oıdamyn. Sonyń ishinde sport salasy da bar. Eshkim anasynan sportshy bolyp týmaıdy. Sport bıigin baǵyndyrý úshin 1 paıyz darynnyń ózi jetkilikti. Qalǵan 99 paıyzyna eńbek pen jattyǵýdyń arqasynda keledi. Al, sol darynnyń tasada qalmaýyn qamtamasyz etý bapkerlerge tikeleı baılanysty»,- deıdi Dıdar Hamza.
Dzıýdoshynyń aıtýynsha, elimizdiń atyn shyǵarǵan talaı tanymal sportshylar jattyǵý zaldarynyń jetispeýshiligi, qarjy tapshylyǵy sııaqty máselelerge tap bolǵan. Soǵan qaramastan olar el abyroıyn asqaqtatýǵa, kók týymyzdy bıikte jelbiretýge tyrysty. Al, búginde elimizde kóptegen sport nysandary boı kóterip, neshe túrli oıyn alańdary salynýda.
«Elbasymyz Nursultan Nazarbaev óziniń sońǵy Joldaýynda buqaralyq sportty damytýǵa kóp kóńil bólý kerektigin aıtty. Sonyń ishinde tıisti mamandarǵa sport zaldar men keshenderge balalardyń kirýin jeńildetý máselesi de bar. Endi elimizde sportpen aınalysatyn jastarǵa sport keshenderi tegin berilmek. Bul el sportyna tyń serpilis ákeletin sheshim dep oılaımyn. Sebebi boıynda talanty bar qanshama jas sport zaldyń esiginen syǵalap qaıtýǵa májbúr»,- deıdi Azııa oıyndarynyń chempıony.