Elbasynyń júrgizgen saıasatyn Toqaev odan ári jalǵastyrady - Takeo Kavamýra

NUR-SULTAN. QazAqparat -Tuńǵysh Prezıdent Nursultan Nazarbaevtyń júrgizip kelgen saıasatyn Qasym-Jomart Toqaev odan ári jalǵastyrady. Japonııa Parlamentiniń Qazaqstanmen dostyq lıgasynyń tóraǵasy, Japonııanyń Parlamen ókilderi palatasynyń depýtaty Takeo Kavamýra osylaı pikir bildirdi, dep habarlaıdy QazAqparat.

«Prezıdent Qasym-Jomart Toqaev xalyqtyń 70% astam daýysyn jınap, jeńiske jetkendigine qatysty jańalyqty estýime oraı shyn júrekten qýanyshymdy bildiremin.

Nursultan Nazarbaev óz erkimen ókilettigin toqtatqannan soń, Konstıtýtsııaǵa sáıkes Prezıdent laýazymyna kelgen Qasym-Jomart Toqaevtyń kandıdatýrasyn prezıdenttik saılaýda usyndy.

Aqparat kózderine sáıkes, daýys kórsetkishiniń 70%-dan asýy, Tuńǵysh Prezıdent N.Nazarbaevtyń júrgizip kelgen saıasatynyń joǵary baǵalanýymen baılanysty», dedi Takeo Kavamýra.

Ol Toqaevtyń osy saıası baǵytty odan ári jalǵastyramyn degen maqsatta bolǵanyn jetkizdi.

«Qasym-Jomart Toqaev óz kezeginde osy saıası baǵytty odan ári jalǵastyramyn degen maqsatpen saılaýda kúresti dep estidim. Sol sebepti, jalpy N.Nazarbaevtyń osy ýaqytqa deıin júrgizip kelgen jetistikteriniń xalyq arasynda baǵalanyp otyrǵandyǵyna óte qýanyshty ekendigimdi aıtqym keledi», dedi ol.

Eske sala ketsek, 12 maýsymda elordadaǵy Táýelsizdik saraıynda jańadan saılanǵan Qazaqstan Prezıdenti Qasym-Jomart Toqaevty ulyqtaý rásimi ótti. Memleket basshysy Qazaqstan halqyna ant berdi.