Elbasynyń Joldaýy - jarqyn bolashaq kepili

ASTANA. QazAqparat - Prezıdent N.Nazarbaevtyń 2017 jylǵy 31 qańtardaǵy «Qazaqstannyń Úshinshi jańǵyrýy: jahandyq báse­kege qabilettilik» atty Joldaýynyń maqsat-múddesi, jaýapkershiligi men talaptary burynǵy qaı kezdegimen bolmasyn aıryqsha bolǵanyn eshkim de teriske shyǵara almaıdy. Elbasy Qazaqstan 2050 jylǵa qaraı álemdegi eń aldyńǵy qatarly 30 memlekettiń qataryna qosylýǵa tıis ekenin qadap turyp aıtty. Memleket basshysynyń bul úkili úmiti eshqandaı da kúmán týdyrmasa kerek.

Qazaq eliniń Birinshi jańǵyrýy aǵa urpaq sanalatyn bizderdiń esimizde. Qazaqstan aýyr ekonomıkalyq jaǵdaıda Táýelsizdigin jarııalap, egemendikke qadam basty. Keń-baıtaq elimizdiń qyrýar qazynasy, jyldar boıy jasalyp-jasaqtalǵan potentsıaly enshimizge berildi. KSRO-nyń qırandysynan shyǵyp, álem kartasynda bolmaǵan jańa memleket qurdyq. Josparly ekonomıkadan naryqty ekonomıkaǵa kóshý júzege asyryldy. Beıbit ómir saltanat qurdy, túrli kesapat-keselge jol berilmedi.

Elimiz Ekinshi jańǵyrýyn «Qa­zaqstan - 2030» strategııasyn qabyldaýmen bastady. Qazaq eliniń jańa elordasy - Astana boı kóterip, óziniń sán-saltanatymen álem nazaryn aýdardy. Respýblıkamyz ekonomıkalyq toqyraý shyrmaýynan bosap, álemdegi ekonomıkasy básekege qabiletti 50 memlekettiń qataryna kirdi.

Osynaý uly jetistik-jeńisterimiz Táýel­sizdigimizdiń 25 jyldyq torqaly toıynda barynsha atap ótildi. Shırek ǵasyrlyq qysqa merzimde Qazaq eli, qazaq halqy álemge tanyldy! Biz muny bar daýyspen aıtyp, maqtanysh etýge qaqymyz bar! Qazirgi Táýelsiz Qazaqstan halyqaralyq arenada joǵary bedelge ıe boldy, ustanyp otyrǵan saıasatymyzdyń berik te bekem ekendigine eshqandaı da kúmán joq.

Elbasy Joldaýynda Úshinshi jań­ǵyrtý jóninde mindet qoıylyp otyr. Bul Joldaýdyń «Qazaqstannyń Úshin­shi jańǵyrýy: jahandyq básekege qabi­lettilik» atalýynan da kórinip tur. Jahandyq básekege qabilettilik. Táýelsiz elimizdiń qalyptasýy men damýy, álemdik básekede egemen el retindegi alar ornymyz ben qabilet-qarymymyzdyń deńgeıi turǵysynan kelgende ultymyzdyń ózindik erekshelikteri men ózgeshelikterin zerdeleý mańyzdy.

Osy oraıda Tuńǵysh Prezı­dentimiz Nursultan Nazarbaevtyń «Qaz­aq­stan joly» atty kitabynda jazǵan tómendegi joldary oıǵa oralady: «Báse­kege qabiletti ult týraly aıtqanda umytylmaıtyn bir tıis nárse - básekege qabilettilik. Bul eń aldymen ózińniń bar­lyq artyqshylyqtaryńdy paıdalana bilý degen sóz, biraq olardy ózimizdiń kim eken­digimizdi uǵynǵannan keıin baryp qana anyqtaýǵa bolady.
Biz - ǵasyrlar boıy álemdik órkenıet­terdiń toǵysqan jerinde ómir súrgen áýletterdiń urpaqtarymyz. Uly Dala qashan da ár túrli mádenıetter, tilder, áskerler, dinder, taýarlar jáne ıdeıalar toǵysqan qıylysta turdy. Myńdaǵan jyldar boıy Dala halyqtardyń generatory boldy. Al, HHІ ǵasyrda ol erekshe sapadaǵy adamnyń generatoryna, jańa ıdeıalardyń generatoryna aınalýy tıis...». 
Ulttyq ıdentıfıkatsııa problemasy kez-kelgen memleket sekildi Qazaqstan úshin de fýndamentaldi mańyzǵa ıe. Ol jekeshe ne qoǵamdyq sanamen, onyń qalyptasýy men damýynyń teorııasymen jáne praktıkasymen tikeleı baılanysty.

Elbasynyń ústimizdegi jylǵy Joldaýyn jasampazdyq Joldaýy retinde qa­byl­daýymyz kerek. Bul Joldaýda alǵa qoıylǵan mindetter elimizdi álemdegi da­myǵan 30 memlekettiń qatarynan kó­ri­nýge bastaıtyn bolady. Nasıhatshy re­­tinde túrli jıyndarda jıi bolyp júr­miz. Qarapaıym aýyl turǵyndarynyń, dı­qandar men malshylardyń, muǵalimder men dárigerlerdiń, san alýan mamandyq ıe­leriniń júrekjardy lebizderine qulaq túrer bolsańyz, olardyń jarqyn bolashaqqa degen nyq senimi, Prezıdent Joldaýyndaǵy basymdyqtardy tereń uǵynýy, Elbasyǵa degen qoshamet-qurmeti janyńyzdy shýaqty nurǵa bóleıdi.