Elbasynyń úndeýi elimizdiń jańǵyrýyndaǵy jańa tarıhı oqıǵa - Qasabek
Іlııas Jansúgirov atyndaǵy Jetisý memlekettik ýnıversıtetiniń oqytýshysy, professor Amanjol Qasabek Memleket basshysynyń úndeýine qatysty osyndaı pikir bildirdi, dep habarlaıdy QazAqparat tilshisi.
Búgin Taldyqorǵan qalasynda atalǵan oqý ornynyń oqytýshylary men stýdentteri Elbasy úndeýin talqylady. Basqosýda Memleket basshysynyń bastamasymen júzege asyrylatyn reformalar týraly sóz bolyp, ondaǵy jastardyń róline de nazar aýdaryldy. Ýnıversıtet oqytýshysy fılosofııa ǵylymdarynyń doktory, professor Amanjol Qasabektiń aıtýynsha, Elbasynyń úndeýi elimizdiń jańǵyrýyndaǵy jańa tarıhı oqıǵa bolyp tabylady.
«Prezıdenttiń ózi búgingi álemniń ózgergenin, qazirgi zamannyń dıdary basqasha bolyp otyrǵanyn aıtyp otyr. Al mundaı ózgerister dúnıe júzinde óris aldy jáne bizdiń eldi de qamtydy. Osyǵan sáıkes otanymyz dástúrli qoǵamnan gýmanıstik qoǵamǵa qaraı bet burdy. Bundaı erekshelik úndeýde basa aıtyldy. Jalpy Qazaqstan álemdik qubylysta óz ornyn alý kerek, al bul úshin biz ózgerýge tıispiz. Bul qaǵıda Prezıdent úndeýiniń negizgi jelisi dep oılaımyn» -dedi Amanjol Qasabek.
Budan bólek, jıyn barysynda sóz sóıleýshiler prezıdenttik bıliktiń qazaq eli úshin mańyzdy ról atqarǵanyna, endigi jerde Parlament pen Úkimetke basqarý júıesinde basymdyq beriletinine, sondaı-aq onyń qarapaıym halyq úshin tıimdi jaqtaryna toqtaldy.
Spıkerler elimizde saıası reformalardyń osydan birneshe jyl buryn bastaý alǵanyn jetkizdi. Elbasy reformasynyń máni bılik tarmaqtaryna ókilettik berý ǵana emes, sonymen birge, úlken jaýapkershilik júkteý ekenine de nazar aýdardy.
Qyzý pikirtalasqa oqytýshylar ǵana emes stýdentter de aralasty. Máselen, pedagogıka jáne psıhologııa fakýltetiniń stýdenti Ásem Qalıbekovanyń paıymynsha, Qazaqstan Elbasy jarııalaǵan reformalardy tıimdi júzege asyra otyryp, aldaǵy ýaqytta da demokratııalyq baǵyttaǵy qarqynyn naqtylaıdy. «Prezıdenttiń arqasynda Qazaqstan 25 jyl ishinde aýyz toltyryp aıtarlyqtaı jetistikterge qol jetkizdi. Ony búginde búkil álem moıyndaıdy. Qazirgi tańda halqymyzdyń saıası belsendiligi artty. Qazaqstan azamaty retinde biz de elimizdiń saıası ómirine aralasyp, óz úlesimizdi qosýymyz kerek»,- dedi ol.
Basqosý sońyna qaraı Elbasy úndeýin nasıhattaý, oǵan qoldaý kórsetý, jalpyhalyqtyq talqylaýǵa salynǵan reformalarǵa belsendilik tanytý máselelerine de nazar aýdaryldy.