Elbasynyń tabandy eńbeginiń arqasynda halqymyz týǵan jerdiń zańdy ıesi sezindi - Toqaev

ASTANA. QazAqparat - Elbasynyń tabandy eńbeginiń arqasynda halqymyz tolǵaýy toqsan, taýqymeti mol tarıhynda ózin tuńǵysh ret týǵan jerdiń zańdy ıesi sezindi. Bul týraly búgin Respýblıka Prezıdenti ókilettigin ýaqytsha atqarýǵa kirisken Qasym-Jomart Toqaev aıtty, dep habarlaıdy QazAqparat tilshisi.

«Nursultan Ábishuly Nazarbaev Táýelsizdiktiń alǵashqy jyldarynan bastap halyqtyń áleýmettik ahýalyn kóterýge baǵyttalǵan, naryqtyq ekonomıkasy bar qýatty egemen memleket qurý isine bilek sybana kiristi. Taıǵaq keshken osy qıly jolda teńdessiz tabystarǵa qol jetkizdi. Elbasynyń ár Joldaýy ásirese, 2018 jyldyń naýryz aıyndaǵy jáne qazan aıyndaǵy úndeýiniń negizgi baǵyttary, sondaı-aq Nur Otan partııasynyń 18-sezinde sóılegen sózi halyqtyń qamyn kózdegen shynaıy janashyrlyqtyń aıǵaǵy bolyp tabylady. Bul qujattarda el azamattaryna áleýmettik qoldaý kórsetýdiń shetel memleketterinde balamasy joq biregeı sharalary kórinis tapqan», - dedi Q.Toqaev.

Sondaı-aq QR Prezıdenti táýelsizdiktiń arqasynda qol jetkizgen tabystar, Qazaqstan halqynyń ortaq tarıhı taǵdyry «Máńgilik el» tujyrymdamasynda aıqyn kórsetiletindigin aıtty. Bul qujattyń ózeginde barshaǵa ortaq maqsat, ortaq múdde, halqymyzdyń ortaq keleshegi úılesim tapqan. Elbasynyń usynysymen ult birligin nyǵaıtý jolynda qýaty kúshke aınalǵan «Máńgilik el» patrıottyq aktisi qabyldandy.

«Táýelsizdik jyldarynyń ishine ulttyq ıdeıalarǵa jáne týǵan jerdiń qasıetti topyraǵyna adal, Otanǵa degen shynaıy súıispenshilik rýhynda tárbıelengen jas azamattardyń tutas bir býyny qalyptasty. Bul oraıda Elbasy júzege asyrǵan jastar saıasaty, mazmuny biregeı «Rýhanı jańǵyrý» jáne «Uly dalanyń jeti qyry» atty maqalalary oń yqpal etti. Elbasynyń tabandy eńbeginiń arqasynda halqymyz tolǵaýy toqsan, taýqymeti mol tarıhynda ózin tuńǵysh ret týǵan jerdiń zańdy ıesi sezindi. Barshamyzdyń júregimizdi otan úshin maqtanysh sezimi kernedi», - dedi Q.Toqaev.

Memleket basshysy «Qazaqstan-2050» strategııasy, «Nurly jol» jańa ekonomıkalyq saıasaty, «100 naqty qadam»- Ult jospary elimizdi jańǵyrtýǵa Qazaqstannyń ekonomıkalyq áleýetin odan ary nyǵaıtýǵa baǵyttalǵanyn aıtty.

«Bul halyqaralyq arenadaǵy turaqsyzdyq pen daǵdarystar ahýalynda asa mańyzdy aqıqat. Qazirgi Qazaqstan - bul naryqtyq ekonomıkasy bar, demokratııalyq, zaıyrly memleket. Elimizde jekemenshik ınstıtýty ornyqty qalyptastan. Orta taptyń jaǵdaıy jáne kásipkerlik qarqyndy damý ústinde. Barlyq ózekti áleýmettik-ekonomıkalyq máseleler ýaqytyly sheshimin tabýda», - dedi QR Prezıdenti.