Elbasynyń eýrazııalyq bastamasynyń 25 jyldyǵyna oraı halyqaralyq konferentsııa ótti
Shara Qazaqstan Respýblıkasy Tuńǵysh Prezıdentiniń M.V.Lomonosov atyndaǵy Máskeý memlekettik ýnıversıtetinde oqyǵan «Praktıkalyq Eýrazııa» ıdeıasy boıynsha sóılegen sózine jáne Eýrazııalyq ekonomıkalyq odaqtyń bes jyldyǵyna arnalyp otyr.
Konferentsııa qatysýshylaryna Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev pen Reseı Federatsııasynyń prezıdenti Vladımır Pýtın quttyqtaý hat joldady. Pýtınniń quttyqtaý hatyn Reseı Federatsııasy Prezıdentiniń shet eldermen aımaqaralyq jáne mádenı baılanystar jónindegi basqarma basshysy Vladımır Chernov oqyp berdi.
«Eýrazııalyq keńistiktegi memleketter sońǵy shırek ǵasyrda teń quqyly memleketterdi jumys istep turǵan qýatty ekonomıkalyq odaqqa biriktirýge deıingi uzaq joldy júrip ótti. Eýrazııalyq ıntegratsııalyq joba tolyqtaı tıimdi bolyp shyqty. Transshekaralyq jáne óńiraralyq yntymaqtastyq serpindi túrde kúsheıip, túrli salalardaǵy jobalardy birlesip damytý jalǵasyp jatyr. Sonymen qatar, EAEO aıasynda ıntegratsııalyq úderister Reseı men Qazaqstan arasyndaǵy qarym-qatynas pen odaqtastyqty nyǵaıtýǵa qosymsha múmkindik beredi», - dep atap ótti óz hatynda Vladımır Pýtın.
Konferentsııaǵa Eýrazııalyq ekonomıkalyq komıssııanyń basshylary, parlamentterdiń, prezıdenttik ákimshilikterdiń, Reseı men Qazaqstannyń syrtqy ister mınıstrlikteriniń ókilderi, elordadaǵy sheteldik dıplomatııalyq mıssııalardyń jetekshileri, jetekshi sarapshylar, qoǵam qaıratkerleri, Eýrazııalyq ekonomıkalyq odaqtyń jýrnalısteri qatysty.
Qazaqstan Respýblıkasy Parlament Senatynyń Tóraǵasy Darıǵa Nazarbaeva joldaǵan quttyqtaý sózdi depýtat Serik Bekturǵanov oqyp berdi.
«Memleketimizdiń saıası jáne áleýmettik-ekonomıkalyq salalarynda transformatsııa bolyp jatqan tarıhı kezeńde Qazaqstan Respýblıkasynyń Tuńǵysh Prezıdenti - Elbasy ıdeıasynyń mańyzy arta tústi. Tarıh tórinde jarqyn jáne taǵdyrly kóshbasshylyqtyń kóptegen úlgisin bilemiz. El basshysynyń bastamalary men ıdeıasynyń aýqymyn, mańyzdylyǵyn baǵalaý úshin belgili bir tarıhı kezeń qajet. Shırek ǵasyr - hronologııalyq qashyqtyq. Bul bastapqy ıdeıany túsinýge, nátıjelerdi baǵalaýǵa, Elbasynyń bul protsestegi eńbegin baǵalaýǵa múmkindik berip otyr », - dep jazylǵan Darıǵa Nazarbaeva joldaǵan quttyqtaýda.