Elbasynyń bes bastamasy qazaqstandyqtardyń ómir sapasyn jaqsartýǵa baǵyttalǵan - sarapshy
Bul týraly QR Prezıdenti janyndaǵy Memlekettik basqarý akademııasy qoldanbaly zertteýler ınstıtýtynyń dırektory Aıgúl Kósherbaeva málimdedi, dep habarlaıdy QazAqparat.
"Meniń oıymsha, Memleket basshysy atap kórsetken bes bastamanyń barlyǵy ómir sapasyn jaqsartýǵa baǵyttalǵan. Ómir sapasy degenimiz - ulttyń básekege qabilettiliginiń negizgi komponentteriniń biri. Qazaqstan básekege qabiletti bolyp, damyǵan 30 eldiń qataryna enýi kerek", - dedi Aıgúl Kósherbeva QR Prezıdenti janyndaǵy Strategııalyq zertteýler ınstıtýtynda Elbasy bastamalaryn talqylaýǵa arnalǵan jıynda.
Sarapshynyń aıtýynsha, óńirlerde halyqtyń baspanaǵa qoljetimdilik deńgeıi ártúrli.
"Keı óńirlerde bir adamǵa 22 sharshy metr baspanadan keledi, al keı óńirlerde bul kórsetkish 15 sharshy metrge deıin tómendeıdi. Eger qoljetimdi baspana bastamasy sapaly júzege asyrylsa, halyqtyń basym bóligi páterge qol jetkizip, óz jaǵdaıyn durystaı alady", - deıdi A. Kósherbaeva.