Elbasynyń atyna Túrikmenstan men Serbııa prezıdentterinen jedelhattar kelip tústi

NUR-SULTAN. QazAqparat – Elbasy Nursultan Nazarbaevtyń atyna Serbııa Respýblıkasynyń prezıdenti Aleksandr Výchıch pen Túrikmenstan Prezıdenti Gýrbangýly Berdimuhamedovten jedelhattar kelip tústi. Bul týraly QazAqparat elbasy.kz saıtyna silteme jasap habarlaıdy.

Serbııa prezıdenti Aleksandr Výchıch Elbasynyń tezirek saýyǵyp ketýine tilektestik bildirdi.

«Ózińizge tán energııa, kúsh-qaırat jáne optımızm koronavırýstan kúshtirek bolady degen senimmen Sizge qoldaý bildirgim keledi.

Jaqyn arada halyqaralyq qaýymdastyq ózara túsinistik pen yntymaqtastyqtyń kómegimen pandemııany eńseredi jáne kedergisiz áleýmettik-ekonomıkalyq damý jolyna qaıta oralady degen úmittemin.

Aıyǵyp ketýińizdi shyn júrekten tileımin. Meniń zor qurmetim men ystyq yqylasymdy qabyl alyńyz», - delingen jedelhatta.

Sondaı-aq, Qazaqstannyń Tuńǵysh Prezıdentiniń atyna Túrikmenstan Prezıdenti Gýrbangýly Berdimuhamedovten jedelhat kelip tústi.

Gýrbangýly Berdimuhamedov Elbasynyń koronavırýs juqtyrǵany týraly habardy úlken alańdaýshylyqpen qabyldady.

«Ómirlik energııańyz ben erik-jigerińizdiń arqasynda Siz bul dertti qysqa merzimde eńseresiz dep senemin.

Sizdi barynsha qoldaýǵa jáne qajet bolǵan jaǵdaıda kómektesýge daıynmyn.

Shyn júrekten tezirek saýyǵyp ketýińizdi tileımin. Alla Taǵala Sizge myqty densaýlyq jáne uzaq ǵumyr bersin», - delingen jedelhatta.

Eske salaıyq, 18 maýsymda Elbasynyń koronavırýsqa jasaǵan PTsR-testi oń nátıje kórsetti. QR Tuńǵysh Prezıdenti – Elbasynyń baspasóz hatshysy Aıdos Úkibaı Nursultan Nazarbaevtyń densaýlyǵy medıtsına qyzmetiniń baqylaýynda ekenin habarlady. Elbasy zamanaýı kommýnıkatsııa kanaldaryn qoldana otyryp, qashyqtan jumys istep jatyr.