Elbasynyń áleýmettik bastamasy aıasyndaǵy shaǵyn nesıe aýyl halqynyń áleýetin arttyrady -kásipker

ÚRJAR. QazAqparat - Elbasynyń bes áleýmettik bastamasy aıasynda shaǵyn nesıe berý eń aldymen aýyl halqynyń áleýetin arttyrady. Búgin Parlamentte jarııa etilgen Úndeýge oraı pikir bildirgen Shyǵys Qazaqstan oblysy Úrjar aýdanyndaǵy kásipker Azat Serik osylaı málim etti, dep habarlaıdy QazAqparat tilshisi.

Eske sala ketsek, Memleket basshysy Nursultan Nazarbaev búgin QR Parlamenti palatalarynyń birlesken otyrysynda 2018 jyly shaǵyn nesıege qosymsha 20 mıllıard teńge bólinetinin aıtqan edi. Osy arqyly beriletin shaǵyn nesıe somasy 62 mıllıard teńgege jetip, ony alatyndar sany 2017 jylmen salystyrǵanda 14 myń adamǵa deıin artatyn bolady.

«Áleýmettik bastama shynynda da óz isin ashamyn, kásip jasaımyn degender úshin úlken múmkindik. ıAǵnı, myńdaǵan adamdar jeke isin dóńgelete alady. Ásirese aýyl-aımaqtarǵa, aýyldaǵy kásipkerlikke óte qajet. Men ózim de osyndaı shaǵyn nesıe alýǵa nıet bildirip júrgen adamnyń birimin. Byltyr «Bastaý Bıznes» jobasy boıynsha bilim alyp, sertıfıkatyn ıelengen edim. Bıylǵy jyly mal sharýashylyǵyn damytý maqsatynda nesıe alýǵa qujattarymdy ótkizbekpin. Prezıdenttiń áleýmettik bastamasymen tanysqanda ózim úshin ǵana emes, aýyldaǵy kóptegen azamattar úshin de qýanyshty boldym. Óıtkeni bul tutastaı óńirdiń damýyna septigin tıgizedi», - deıdi Qaratal aýyldyq okrýginiń turǵyny, «Arda» sharýa qojalyǵynyń basshysy Azat Serik.

Aıta keteıik, ótken jyly Úrjar aýdanynda 31 adam «Jumyspen qamtý» baǵdarlamasy arqyly 176 mıllıon 500 myń teńge nesıe alǵan bolatyn. Al, «Bastaý Bıznes» jobasy boıynsha 213 adam oqyp, onyń 52-si shaǵyn nesıege qol jetkizdi. Bıyl osy múmkindik eselene túsetin bolady.