Elbasynyń áleýmettik bastamalaryn aýstrııalyqtar qalaı qabyldady
«Eń aldymen táýelsizdik jyldary Qazaqstannyń qanshama bıik maqsattarǵa qol jetkizgenin, memleket, partııa jáne azamattardyń qosqan úlesin atap kórsetken oryndy. Degenmen, Prezıdenttiń qazirgi «statýs-kvoǵa» kóńili tolmaıtyny aıqyn kórinip tur, sondyqtan ákimder men úkimettiń aldyna jańa mindetter qoıdy», - dep jazady Aýstrııa - Qazaqstan qoǵamynyń bas hatshysy Dıtmar Fellner QazAqparat joldaǵan saýalǵa bergen jaýabynda.
«Prezıdent alǵa qoıǵan eń mańyzdy mindet - halyqtyń jaǵdaıyn jaqsartý máselesi. Ol qarjylyq ál-aýqattyń jetkiliksiz ekenin, onymen qosa sapaly bilim berý, medıtsınalyq kómekpen qamtamasyz etý, ár otbasy úshin jaqsy turmys jaǵdaıyn jasaý qajettigin qadap aıtty», - deıdi D. Fellner.
«Memlekettik bıýdjettiń 45% áleýmettik sektorǵa baǵyttalýy - fantastıkalyq kórsetkish, bul Prezıdent pen partııa kimniń ómirin jaqsartýǵa kúsh salyp jatqanyn aıqyn kórsetedi», - dep sanaıdy D. Fellner.
Aýstrııa ekonomıkalyq palatasynyń vıtse-prezıdenti Rıhard Şentstiń pikirinshe, «Nur Otan» partııasynyń sezine jastardyń belsendi qatysýy men ekonomıkaǵa kóp kóńil bólinýi halyqtyń ómir súrý standarttaryn aıtarlyqtaı jaqsartady.
«Prezıdent eń aldymen turǵyndardyń álsiz býynynyń qajettilikterine toqtala otyryp, kásipkerliktiń básekege tózimdiligin arttyrýǵa, bilimdi jastardyń áleýetin joǵarylatýǵa kúsh salý qajettigin aıtty. Bul - eldiń bolashaǵy jarqyn bolatynynyń aıǵaǵy», - deıdi ol.
«Osynyń bári - Prezıdenttiń burynnan júrgizip kele jatqan saıasatynyń logıkalyq jalǵasy. Sol saıasattyń Qazaqstannyń beıbit ári dáıekti damýynyń irgetasy ekenin moıyndaýymyz qajet. Eýropa da, sonyń ishinde Aýstrııa da dál osyndaı damý baǵytyn ustanýdy qalaıdy», - dep túıdi Rıhard Şents.
Avtor: Tımýr Dúısekeev