Elbasynyń álem qaýymdastyǵy úshin sińirgen eńbegin árqashan qurmetteımiz - Qasym-Jomart Toqaev

NUR-SULTAN. QazAqparat - Nursultan Ábishuly Nazarbaev búkil álem moıyndaǵan damý modelin jasady. Bul týraly Táýelsizdik saraıyndaǵy ulyqtaý rásiminde Qazaqstan Prezıdenti Qasym-Jomart Toqaev málim etti, dep habarlaıdy QazAqparat tilshisi.

«Aqıqatyn aıtýymyz kerek, bul saılaýda bizdiń azamattarymyz Elbasynyń strategııalyq baǵdaryn qoldap, daýys berdi! Nursultan Ábishuly Nazarbaev búkil álem moıyndaǵan damý modelin jasady. Qazaqstannyń Kók Týyn dúnıejúziniń túpkir-túpkirinde jelbiretti. Osy kúnderi meniń atyma azamattarymyzdan kóptegen ótinish-tilekter kelip túsýde. Olardyń bárine ortaq bir ǵana tilek bar: Elbasymyzdyń jolyn, Strategııasyn saqtaý jáne ony odan ári nyǵaıtý. Shyn máninde halyqtyń dál osyndaı ótinish-tilek aıtýy zańdy ári oryndy. Sebebi qazirgi damyǵan Qazaqstan - bul, eń aldymen, Elbasynyń arqasy», - dedi Q. Toqaev.

Osy oraıda Qasym-Jomart Kemeluly Elbasy jahandyq deńgeıdegi memleket qaıratkeri ekenin atap ótti.

«Álem tarıhyna dál osylaı jazyldy. Elbasynyń halqymyz úshin jáne álem qaýymdastyǵy úshin sińirgen orasan zor eńbegin árqashan qurmetteý - bárimizge ortaq paryz» , - dedi Prezıdent.