Elbasynyń AQSh-qa sapary strategııalyq seriktestiktiń jańa kezeńi - ÁESI

ASTANA. QazAqparat -Qazaqstan Respýblıkasynyń Prezıdenti Nursultan Nazarbaevtyń 16 qańtar kúni bastalǵan Amerıka Qurama Shtattaryna resmı saparyn sátti ótti dep baǵalaýǵa bolady. Bul týraly QR Tuńǵysh Prezıdenti - Elbasy qorynyń Álemdik ekonomıka jáne saıasat ınstıtýty aıtty, dep habarlaıdy QazAqparat.

Atalǵan ortalyq jarııalaǵan pikirge qaraǵanda, «Qazaqstan men Amerıka prezıdentteriniń jeke kezdesýi eki el arasyndaǵy ózara qarym-qatynas tarıhynyń jańa paraǵyn ashyp, birqatar naqty nátıjeler ákeldi.

«Birinshiden, keńeıtilgen strategııalyq seriktestikti ornatý jóninde ortaq saıası sheshimder qabyldandy. Bul bıyl 26 jyl tolatyn eki el arasyndaǵy jemisti seriktestik odan ári tereńdeı túsetinin bildiredi.

Astana úshin Vashıngton syrtqy saıasattaǵy negizgi seriktes ári ekonomıkadaǵy mańyzdy ınvestor bolyp tabylady. Óz kezeginde Donald Tramp atap ótkendeı, Amerıka qýatty, derbes jáne táýelsiz Qazaqstandy AQSh-tyń Orta Azııadaǵy senimdi dosy ári strategııalyq seriktesi retinde qarastyrady, - delingen habarlamada. - Bul jerde ekonomıkalyq máseleni de atap ótý qajet. Kelissóz qorytyndysy boıynsha ótken brıfıng barysynda Memleket basshysy jalpy somasy $7,5 mlrd asatyn 20 kelisimshartqa qol qoıý kózdelgenin atap ótti. Astana AQSh-pen joǵary tehnologııalar men ınnovatsııalyq óndirister transferti boıynsha baılanysty damytýǵa muqtaj ekeni jasyryn emes. Bul turǵydan alǵanda, jańa kelisimder Qazaqstanǵa ekonomıkadaǵy «tsıfrlandyrý» máselesin júzege asyrýǵa múmkindik beredi dep senimmen aıtýǵa bolady.

Ekinshiden, D. Tramp pen N. Nazarbaev AQSh pen Qazaqstannyń halyqaralyq jáne aımaqtyq qaýipsizdikti kúsheıtý boıynsha ortaqtasa áreket etetindikterin rastady.

Bul Qazaqstan men AQSh kúshterin Aýǵanstan boıynsha biriktirýdi bildiredi. Sonymen birge, Qazaqstan terrorızmge qarsy kúrestegi AQSh talpynystaryn qoldaıtynyn málimdedi. Eki el basshylary Soltústik Koreıadaǵy ıadrolyq másele boıynsha ortaqtasa jumys isteıtinderin de atap ótti.

Úshinshiden, Qazaqstan men AQSh «S5+1» aımaqtyq dıalog alańy aıasyndaǵy seriktestik damytý týraly kelisimge keldi. Bul turǵyda atalmysh alań jumysynan jańa bastamalar kútýge bolady», - deıdi.

Jańa ákimshilik óz jumysyn bastap, D. Tramptyń «Aldymen Amerıka» urany tastalǵan soń, Ortalyq Azııada Vashıngtonnyń aımaqqa degen qyzyǵýshylyǵynyń tómendeýi týraly kóp aıtyldy. Alaıda, N.Nazarbaevtyń sapary men onyń D.Tramppen kezdesýi Vashıngton úshin aımaqtyń joǵary deńgeıde turǵanyn anyq kórsetti.